A janë optimistë qytetarët për gjendjen e ekonomisë? – Vrojtimi i BSH, sektori i tregtisë më “pesimisti” për ecurinë e biznesit aktual

Ledina Elezi/SCAN

 

Konsumatorët dhe bizneset shqiptare e shohin me optimizëm ecurinë e ekonomisë. Referuar të dhënave zyrtare nga Banka e Shqipërisë, besimi i bizneseve dhe qytetarëve në ekonomi ka pësuar një rritje të lehtë me 0,7 pikë gjatë muajit korrik.

Kompanitë e ndërtimit janë ato që kanë treguar shkallën më të lartë të besimit në ekonomi. Konkretisht, treguesi i besimit në ndërtim u rrit me 2.7 pikë përqindje gjatë muajit të kaluar. Niveli i tij aktualisht qëndron 21 pikë mbi mesataren historike dhe pranë maksimumit historik. Kjo rritje ka ardhur si pasojë e pritshmërisë për fitime më të larta nga aktiviteti aktual ndërtues, por edhe nivelit të porosive të reja.

Nga ana tjetër, edhe treguesi i besimit të industrisë regjistroi rritje të lehtë me 0.3 pikë përqindje në muajin korrik. Kjo rritje u ndikua kryesisht nga vlerësimet më optimiste të bizneseve për prodhimin industrial aktual dhe për nivelin e porosive të reja. Gjithashtu, bizneset ishin optimiste edhe për rritjen e prodhimit industrial në të ardhmen.

Ndërkohë, besimi i sektorit të shërbimeve në situatën ekonomike është rritur me 1.7 pikë përqindje. Ata presin një kërkesë më të lartë për shërbime, e cila do të shoqërohet me një ulje të çmimeve nga ana e tyre.

Vetëm sipërmarrjet që merren me tregti, kanë shfaqur pesimizëm për sa i takon ecurisë së veprimtarisë së tyre tregtare. Treguesi i besimit në tregti regjistroi rënie me 3.1 pikë përqindje në muajin korrik, megjithëse pritet edhe një rritje e çmimeve në të ardhmen.

Po si paraqitet besimi i qytetarëve në ekonomi?

Qytetarët e pyetur nga Banka e Shqipërisë, nuk janë shprehur shumë optimistë për situatën ekonomike. Megjithatë, treguesi i përgjithshëm i besimit konsumator regjistroi rritje me 0.5 pikë përqindje në muajin korrik, duke ndërprerë prirjen rënëse të dy muajve të fundit. Kjo për shkak se pritjet për blerjet në shuma të mëdha u rritën në korrik bashkë me pritjet për një nivel më të ulët papunësie.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.