Alarmi shqetësues i KE: Shqipërisë po i “gërryhet” toka – Fenomeni shumë agresiv! Vetëm 2.6 % përdoret për bujqësi organike!
Rajoni i Ballkanit Perëndimor ku bën pjesë dhe Shqipëria rrezikon të humbasë 1/3 e tokës bujqësore si pasojë e erozionit ujor. Ky paralajmërim shqetësues vjen nga një studim që ka realizuar Qendra e Përbashkët Kërkimore e Komisionit Europian. Autorët e raportit paralajmërojnë se ky fenomen është shumë agresiv e si rrjedhojë, krahas erozionit ujor, sipërfaqja është në rrezik shkatërrimi në masën 45 % të saj edhe nga erozioni i tokës. Gjetjet u publikuan me rastin e Takimit Ministror të Platformave të Ballkanit Perëndimor.
Ndërkohë, vetëm 2.6% e sipërfaqes bujqësore përdoret për bujqësi organike, shumë larg objektivit të BE-së prej 25%.
Bazuar në rezultatet e këtij studimi, degradimi i tokës po zgjerohet në Ballkanin Perëndimor ndaj duhet të merren masa me qëllim që të amortizohen efektet e këtij procesi shkatërrimtar.
Raporti kishte në fokus ndryshimet klimatike dhe impaktin në Ballkanin Perëndimor. Ajo që evidentohet në këtë raport është se ka një progres të kufizuar në mbrojtjen e mjedisit dhe klimës në Ballkanin Perëndimor
Ballkani Perëndimor ka bërë disa përmirësime në përafrimin e monitorimit të mjedisit dhe klimës, si dhe në raportimin e legjislacionit me standardet e BE-së. Zbatimi, megjithatë, është i parregullt, përfundon raporti në të cilin shprehet shqetësim për cilësinë e ajrit dhe ujërave dhe për pasojat e rrezikshme të tyre në shëndet.
Për të mbështetur miratimin dhe zbatimin e acquis të BE-së, Komisioni Evropian propozoi Agjendën e Gjelbër për Ballkanin Perëndimor, duke përshkruar një strategji rritjeje për rajonin, e cila bazohet në një ekonomi të qëndrueshme. Agjenda e Gjelbër synon ta përafrojë Ballkanin Perëndimor me Marrëveshjen e Gjelbër Evropiane, duke e bërë Evropën një kontinent neutral ndaj karbonit deri në vitin 2050.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.