BE nis përgatitjet për blerjen e përbashkët të gazit – Një kompani do të vlerësojë kërkesat e vendeve
Bashkimi Europian ka caktuar platformën e gazit ‘Prisma” për të vlerësuar kërkesën kolektive të vendeve për gaz, në një kohë që blloku prej 27 vendesh anëtare vazhdon me planin për të nisur blerjen e përbashkët të gazit.
Komisioni Europian shpreson se blerja e përbashkët e gazit do të ndihmojë Europën të rimbushë rezervat e varfëruara të magazinimit përpara dimrit të ardhshëm dhe të negociojë çmime më të ulëta duke përdorur fuqinë blerëse kolektive të vendeve të BE-së.
Komisioni Europian javën e kaluar nënshkroi një kontratë me ‘Prisma’, e cila është platforma më e madhe e rezervimit të kapaciteteve të BE-së për transportin e gazit, sipas një zëdhënësi të Komisionit Europian i cili konfirmoi lajmin për agjencinë Reuters. ‘Prisma’ do të jetë përgjegjëse për grupimin e nevojave të vendeve për importin e gazit dhe kërkimin e ofertave nga furnizuesit e gazit për të përmbushur këto vëllime.
Brukseli dëshiron që vendet të fillojnë blerjet e para të përbashkëta të gazit para verës dhe të publikojnë sasinë e gazit që vendet duan të blejnë bashkë në fillim të pranverës, për të tërhequr ofertat e furnizimit. Vendet e BE-së duhet të sigurojnë që kompanitë e tyre vendase të marrin pjesë në grumbullimin e kërkesës për gaz, me vëllime të barasvlershme me 15% të gazit të nevojshëm për të mbushur objektet e depozitimit të atij vendi deri në 90% të kapacitetit.
Disa zyrtarë të BE-së kanë thënë se disa kompani të mëdha energjetike kanë shprehur hezitim për t’u bashkuar, pasi ato tashmë mund të negociojnë marrëveshjet e tyre të gazit dhe dyshojnë se skema e BE-së do të shkaktojë çmime më të ulëta.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.