Bie borxhi i jashtëm në 10.1 mld euro – Investimet në trajtën e huave zënë pjesën më të madhe të stokut total

Ledina Elezi/SCAN

 

Pas një rritje të fortë në tremujorin e parë, borxhi i jashtëm i qeverisë ka shënuar rënie në të dytin, megjithatë duke qëndruar mbi nivelin e 10 miliardë eurove. Të dhënat zyrtare nga Banka e Shqipërisë tregojnë se stoku i borxhit të jashtëm bruto zbriti në 10,111 miliardë euro në fund të gjashtëmujorit, nga 10,292 miliardë që ishte në periudhën janar-mars.  Krahasuar me të njëjtin tremujor të një viti më parë, kur borxhi i jashtëm bruto ishte 10,205 miliardë euro, këtë vit ai rezulton 0.9% më i ulët.

Në ndarjen sipas instrumenteve të përdorura, peshën më të madhe ndaj stokut total të borxhit të jashtëm e zënë investimet në trajtën e huave, ndjekur më pas nga monedha dhe depozita, kredi tregtare ose paradhënie, si dhe tituj borxhi.

Në fund të gjysmës së parë të vitit 2024, thuajse 90% e borxhit të huaj vlerësohet të jetë borxh afatgjatë (përfshirë këtu investimet direkte, huatë ndërkompani) kryesisht në formën e huave. Borxhi afatshkurtër vlerësohet në rreth 10% ndaj totalit, i marrë kryesisht në formën e monedhave dhe depozitave nga sektori i korporatave depozituese (përjashtuar bankën qendrore).

Një borxh i jashtëm bruto më i ulët krahasuar me një tremujor më parë tregon se vendi ynë ka ulur shumën e parave që i detyrohet kreditorëve të huaj. Rënia e përgjithshme e borxhit është edhe rrjedhojë e lëvizjeve të mëdha në kursin e këmbimit valutor. Forcimi i lekut në raport me monedhat e huaja, specifikisht euros, ka ndikuar në vlerën e borxhit të jashtëm kur konvertohet në monedhën vendase.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.