Apple prezanton iPhone 16 – Versioni i ri vjen me veçori të avancuara të “IA”

Kristi Ceta/SCAN

 

Apple ka prezantuar telefonin e ri iPhone 16, me inteligjencë artificiale të përforcuar. Kompanitë e teknologjisë në mbarë botën po garojnë për të shtuar inteligjencën artificiale në produkte dhe telefonat pritet të jenë një nga fushat më të rëndësishme të betejës. Kompania me bazë në Cupertino, Kaliforni, gjithashtu po shpreson se veçoria e IA do t’i shtyjë konsumatorët të përmirësojnë modelin e tyre pas ngadalësimit të shitjeve të iPhone.

Apple Intelligence, softueri AI i kompanisë, do të përdoret për të përmirësuar asistentin personal, Siri, si dhe kuptimin e identifikimin e objekteve të kapura nga kamera e telefonit.

iPhone 16 do të përdorë çipin e ri A18 dhe do të ketë një pjesë të pasme prej alumini, si dhe një buton të ri të personalizuar që mund të përdoret për kontrollet e kamerës. iPhone 16 do të vijë tek përdoruesit duke nisur nga 799 dollarë, ndërsa iPhone 16 Plus do të ketë çmimin minimal 899 dollarë.

Apple zbuloi gjithashtu iPhone 16 Pro dhe 16 Pro Max, modele titani me një çip më të shpejtë, A18 Pro, dhe më shumë aftësi inteligjence artificiale, të tilla si ofrimi i sugjerimeve se si të bëni një foto në mënyrë më efektive dhe aftësitë e editimit të audios në nivel profesional. iPhone 16 Pro vjen me çmimin minimal 999 dollarë dhe 16 Pro Max fillon nga 1,199 dollarë.

Kompania gjithashtu zbuloi orët e reja dhe AirPods me aftësi të përqendruara te shëndeti, si dhe përmirësime të dizajnit të harduerit. Apple theksoi aftësinë e orës për të zbuluar gjëndje shëndetësore afatgjata si apnea e gjumit, si dhe zbulimin dhe reagimin ndaj urgjencave të tilla si rënia.

Teksa përditësonte AirPods, Apple nxori veçoritë e aparatit të dëgjimit që ka paraqitur për shqyrtim rregullator në SHBA. Telefonat e Apple përbënin më shumë se gjysmën e shitjeve të Apple prej 383 miliardë dollarësh vitin e kaluar.

Linja e iPhone 16 është telefoni i parë inteligjent i Apple i krijuar rreth veçorive të reja të inteligjencës artificiale, megjithëse ato pritet të jenë gjithashtu të disponueshme në iPhone 15 Pro dhe Pro Max, versionet më të fundit të pajisjeve të gjeneratës së mëparshme.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.