Bie sërish çmimi i naftës – Shkak, rritja e normave në SHBA dhe kërkesa e dobët e Kinës

Çmimet e naftës ranë sërish të hënën e 1 majit si pasojë e ankthit mbi perspektivën e rritjes së normave të interesit nga Rezerva Federale e SHBA, e cila mund të ngadalësojë rritjen dhe të godasë kërkesën për karburant; por dhe shqetësimet për të dhënat më të dobëta të prodhimit kinez të kombinuara për të ‘fshirë’ fitimet e mëparshme. Kontratat e së ardhmes Brent për dorëzimet e korrikut ranë 61 cent, në 79.72 dollarë për fuçi, ndërsa nafta e papërpunuar e Teksasit Perëndimor humbi 63 cent, për t’u tregtuar me 76.15 dollarë.

Shpenzimet konsumatore të SHBA-së ishin të sheshta në mars, pasi një rritje në shpenzimet për shërbime u kompensua nga një rënie në mallra, por forca e vazhdueshme në presionet themelore të inflacionit mund të bëjë që Rezerva Federale të rrisë përsëri normat e interesit. Sipas ekspertëve të sektorit një qëndrim i ashpër i FED mund të ushtrojë presion mbi energjinë dhe metalet.

FED pritet të rrisë normat e interesit me 25 pikë bazë këtë javë. Banka qendrore e SHBA ka rritur normën e saj me 475 pikë bazë që nga marsi i vitit të kaluar nga niveli afër zeros në intervalin aktual 4.75-5%.

Rritja ekonomike në SHBA u ngadalësua më shumë se sa pritej në tremujorin e parë. Një përshpejtim në shpenzimet konsumatore u kompensua nga bizneset që likuidonin inventarët në pritje të kërkesës më të dobët në fund të këtij viti, mes kostove më të larta të huamarrjes.

Ndërkohë, indeksi i menaxherëve të blerjeve të prodhimit të Kinës – PMI – ra në 49.2 nga 51.9 në mars, duke rrëshqitur nën pikën prej 50 pikësh që ndan zgjerimin dhe tkurrjen e aktivitetit në baza mujore.

Aktiviteti i fabrikave në Japoni, ekonomia e tretë më e madhe në botë, u tkurr për muajin e gjashtë radhazi në prill, por sektori i prodhimit po shkonte drejt stabilizimit mes një rënieje më të ngadaltë të porosive të reja.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.