Bitcoin thyen edhe nivelin e 44,000 USD – Societe Generale, e para bankë që hedh në treg një “stablecoin”
Bitcoin po tregtohet pranë 44,000 dollarëve në sesionin e sotëm dhe po realizon fitimet më të gjatë në seri që nga maji i këtij viti, për shkak të pritshmërive për lehtësimin e politikave monetare nga bankat qendrore. Aseti më i madh dixhital po qëndron në rritje për të shtatën ditë me radhë, duke avancuar me afërsisht 16%, ndërsa fitimet për këtë vit kanë arritur deri në 160%. Që nga mesi i shtatorit, kur filloi edhe rritja e madhe, bitcoin ka fituar rreth 80% të vlerës dhe me shpejtësi i kapërceu nivelet e 30,000 dhe 40,000 dollarëve.
Së bashku me bastet se Rezerva Federale mund të fillojë të ulë normat e interesit vitin e ardhshëm, rritja e bitcoin është nxitur edhe nga spekulimet se SHBA mund të jetë afër lejimit të fondeve të tregtuara në shkëmbim në Bitcoin. Ndër zhvillimet e tjera, banka franceze, Societe Generale njoftoi se ka filluar tregtimi i “stablecoin”-it ose “monedhës së qëndryeshme” të quajtur EUR Coinvertible, në platformën europiane të këmbimit të kriptomonedhave, Bitstamp.
“Stablecoin” i bazuar në Ethereum u zhvillua nga divizioni i kriptove të bankës franceze, Societe Generale Forge, dhe u prezantua në prill si një mjet për klientët institucionalë për të lidhur tregjet tradicionale të kapitalit dhe asetet dixhitale. Stabilcoin u përdor për herë të parë të hënën nga AXA IM, njësia e menaxhimit të aseteve të gjigantit të sigurimeve AXA, për të blerë 5 milionë euro obligacione të gjelbëra të tokenizuara.
Listimi i EUR Coinvertible në Bitstamp me qendër në Luksemburg zgjeron aksesin tek tregtarët me pakicë dhe shënon rastin e parë që një “monedhë e qëndrueshme” e emetuar nga një bankë plotësisht e rregulluar, është e disponueshme në një “Exchange” kriptomonedhash.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.