Bllokim automatik i llogarive të 130 mijë debitorëve të tatimeve – Sistem i ri elektronik që lidh 11 bankat tregtare me Tatimet

Tatimet dhe bankat në vend do të kenë së shpejti një sistem të digjitalizuar komunikimi në lidhje me mbledhjen e detyrimeve tatimore të papaguara.

Ngritja e këtij sistemi vjen pas problematikave të konstatuara gjatë auditimeve pranë Drejtorisë së Detyrimeve Tatimore të Papaguara në Drejtorinë e Përgjithshme të Tatimeve  dhe në Rajonin Qendror, si dhe nisur nga volumi i lartë i proceseve për realizimin dhe marrjen e masave shtrëguese, kryesisht “bllokimet e llogarive”.

Rezulton se janë 130 mijë debitorë me detyrime tatimore të papaguara, duke sjellë kështu një kosto të lartë për ndjekjen e tyre nga ana e administratës tatimore, raporton SCAN.

Kjo ndodh pasi në momentin e kryerjes së një shkrese normale të urdhër bllokimit nga ana e inspektorit për 1 tatimpagues debitor, shkresa kalon në disa procese të tjera të cilat kryhen manualisht.

Mesatarisht çdo ditë dalin 300-400 urdhërbllokime të cilat duhet të kalohen nëpër procedurat e institucioneve dhe të bankave duke sjellë shpeshherë mangësi e deri edhe skema mashtrimi.

Për këtë qëllim, është shpallur edhe tenderi përkatës që ka si objektiv përmirësimin e procedurave për realizimin sa më të shpejtë dhe më efektiv të  masave shtrënguese dhe konkretisht të “Bllokimit të llogarive Bankare” përmes një sistemi elektronik.

Sistemi synon mbledhjen më shpejt dhe në kohë të detyrimeve të papaguara, uljen e ndjeshme të kostove për marrjen e masave shtrënguese, rritjen e arkëtimeve të detyrimeve të papaguara, zvogëlimin e stokut të detyrimeve të papaguara si dhe shmangien e skemave të mashtrimit që ndodhin për shkak se aktualisht proceset kryhen manualisht.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.