Bursat europiane, në qëndrueshmëri – Tregjet, në pritje të inflacionit në Gjermani dhe takimit të FED

Tregjet europiane të aksioneve janë hapur me ndryshime të vogla, në sesionin e sotëm, për shkak të shqetësimeve se bankat qendrore më të mëdha në botë do të detyrohen të shtrëngojnë agresivisht politikat monetare, në një kohë që inflacioni qëndron i lartë. Indeksi pan-Europian STOXX 600 e ka nisur ditën në rënie të lehtë me 0.2%.

Një ditë më parë, investitorët reaguan duke shitur aksione, ndaj mundësive që bankat qëndrore në Europë dhe në Shtetet e Bashkuara të rrisin ndjeshëm normat e interesit, për shkak të kërcënimeve inflacioniste.

Komiteti Federal i Tregut të Hapur në SHBA pritet gjerësisht të rrisë normën bazë të interesit, me të paktën 50 pikë bazë, por ka edhe nga ata që besojnë se rritja do të jetë me 75 pikë bazë. Gjithashtu, edhe Banka e Anglisë do të njoftojë vendimet e politikave monetare të enjte.

Për sa i përket të dhënave ekonomike në Europë, investitorët po presin inflacionin në Gjermani për majin dhe papunësinë në Mbretërinë e Bashkuar për prillin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.