Çekia në protesta masive kundër politikave pro-perëndimore të qeverisë!

Mijëra mbështetës të një partie opozitare pro-ruse çeke u mblodhën në Pragë të shtunën për të protestuar kundër qeverisë së qendrës së djathtë të vendit, duke kritikuar menaxhimin e saj ekonomik dhe mbështetjen ushtarake për Ukrainën.

Protesta është thirrur nga Lëvizja PRO, e cila nuk përfaqësohet në parlament dhe ka marrë një linjë nacionaliste, pro Moskës dhe antiperëndimore.

Agjencia e lajmeve CTK vlerësoi pjesëmarrjen në rreth 10,000 njerëz, më e vogël se një ngjarje e ngjashme një vit më parë, e cila u zhvillua në kulmin e rritjes së çmimit të energjisë në Europë.

“Ne bëmë një hap tjetër sot për të hequr nga rruga shkëmbin që është qeveria e zotit (Kryeministri Petr) Fiala,” tha udhëheqësi i PRO Jindrich Raichl para turmës në sheshin Wenceslas të Pragës.

“Ata janë agjentë të fuqive të huaja, njerëz që përmbushin urdhrat, kukulla të zakonshme. Dhe unë nuk dua më një qeveri kukull,” tha Raihl, duke thënë se Republika Çeke duhet të vërë veton ndaj çdo përpjekjeje të Ukrainës për t’u bashkuar me NATO-n.

Nën qeverinë aktuale, Republika Çeke ka qenë një aleat i ngushtë i Ukrainës, duke dërguar tanke, raketahedhës, helikopterë, predha artilerie dhe materiale të tjera për të ndihmuar forcat ukrainase që luftojnë pushtimin rus.

Raichl përshëndeti politikat nacionaliste të kryeministrit hungarez Viktor Orban si një model dhe bëri thirrje për një aleancë të vendeve të Europës Qendrore për t’iu kundërvënë Brukselit.

Ai shprehu gjithashtu mbështetje për ish-kryeministrin e Sllovakisë Robert Fico, i cili ka miratuar një qëndrim të vendosur anti-perëndimor përpara zgjedhjeve të 30 shtatorit.

Protestuesit kritikuan gjithashtu administrimin e qeverisë ndaj ekonomisë, e cila ka pësuar inflacion dyshifror dhe ka rezultuar nën performancën e homologëve të saj evropianë, me prodhim që nuk është kthyer ende në nivelet e para-COVID.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.