Censi i popullsisë dhe banesave nis më 18 shtator – Drejtorja e INSTAT, Elsa Dhuli: Procesi kushton 16 milion euro, 8 mijë të punësuar

Regjistrimi i popullsisë dhe banesave do të nisë më 18 shtator 2023. Këtë e bën të ditur drejtorja e INSTAT, Elsa Dhuli e ftuar në emisionin Scan Update duke shtuar se të dhënat e para të censit do të publikohen brenda qershorit 2024.

“Censi i Popullsisë dhe banesave do të kryhet sikurse edhe ju e theksuat në muajin Shtator, data e parë e fillimit të Censit do të jetë 18 Shtator. Do të ketë një kohëzgjatje prej 6 javësh në terren, që do të thotë përfundon në fund të muajit Tetor. Për një periudhë afro 6-7 muaj ne do të kemi rezultatet e para të këtij procesi. Që do të thotë, rezultatet e para do të jepen në fund të muajit Qershor të vitit në vazhdim”, u shpreh Elsa Dhuli, Drejtoresha e INSTAT.

Për censin do të angazhohen 8 mijë persona të trajnuar. Ata do të shkojnë derë më derë të pajisur më tablet. Të dhënat e mbledhura gjatë anketimit do të kalojnë automatikisht në serverin e INSTAT. Kostoja e teknologjisë do të shkojë rreth 300 milionë lekë, ndërkohë i gjithë procesi do të kushtojë 16 milionë euro.

“Do të angazhohen rreth 8 mijë persona, të cilët janë intervistues, që do të trokasin derë më derë, pranë të gjitha ndërtesave dhe banesave në territorin e Republikës së Shqipërisë. Është një kontingjent i kontrollorëve, të cilët do të monitorojnë cilësinë  e punës së anketuesve në terren, sikurse mbikëqyrësit të cilët përsëri do të monitorojnë pjesën e punës së kontrollorëve. Ajo që është e veçantë për Censin tonë në këtë vit, pra në vitin 2023, i cili do të kushtojë afro 16 milion euro është sepse do të blihen pajisje teknologjike, tabletë, që do të shërbejnë për procesin e grumbullimit të Censit”, tha Dhuli.

Të gjitha pyetjet janë të detyrueshme. Vetëm 3 prej tyre identifikimi etnik, feja dhe gjuha janë opsionale. Në rast refuzimi për pjesën tjetër, do të vendosen gjoba.

“Në pyetësorin e censit të vitit 2023 janë përsëri 3 pyetje, të cilat ne i konsiderojmë pyetje opsionale për faktin që ato pyetje përmbajnë opsionin e të drejtës për të mos u përgjigjur nga intervistuesi. Pyetjet lidhen me identifikimin etnik, me fenë dhe me gjuhën” u shpreh Dhuli.

Ky census i cili vjen 12 vjet pas atij të vitit 2011. Procesi është vonuar  me 3 vjet për shkak të pandemisë dhe zgjedhjeve.

Blerta Lata / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.