Cili vend europian takson me shumë makinat? – Në 13 shtete të BE mblidhen 374.6 miliardë euro të ardhura

Taksimi i automjeteve ndryshon në masë të madhe në të gjithë Europën me konsideratat mjedisore që luajnë një rol kyç në disa vende. Bazuar në të dhënat e OECD, është hartuar një raport për çmimet e automjeteve para dhe pas pagimit të taksave në katër kategori të ndryshme. Taksat që lidhen me blerjen, regjistrimin dhe përdorimin e automjeteve janë një burim i rëndësishëm të ardhurash për qeveritë. Taksimi përdoret gjithnjë e më shumë për të ndikuar në sjelljen e konsumatorit.

Niveli dhe struktura e taksave, të cilat mund të përfshijnë tatimin mbi vlerën e shtuar – TVSH, tatimin mbi shitjen, akcizat dhe tarifat e tjera, kur blihet një automjet i ri mund të ndryshojnë ndjeshëm në të gjithë Europën. Në vitin 2022, normat e TVSH-së për blerjet e automjeteve varionin midis anëtarëve të BE-së nga 17% në Luksemburg në 27% në Hungari sipas Shoqatës Europiane të Prodhuesve të Automobilave – ACEA.

Në shumicën e vendeve të BE-së, njerëzit paguajnë ose 20% ose 21% TVSH kur blejnë automjete të reja. Janë vetëm gjashtë vende ku norma e TVSH-së është mbi 23%. Norma e TVSH-së nuk është arsyeja kryesore pse çmimet e automjeteve ndryshojnë ndjeshëm para dhe pas tatimit në të gjithë Europën. Taksat, tarifat dhe shpërblimet e tjera kanë ndikimin e tyre të rëndësishëm. Duke parë të ardhurat mesatare vjetore të taksave për automjet në tregjet kryesore të BE-së, është regjistruar një ndryshim i madh në vitin 2022. Spanja me 1.148 euro mblodhi totalin më të vogël të taksave për automjet ndërsa Belgjika me 2.892 euro mblodhi më shumë.

Kjo shifër ishte 1.625 euro në Francë, 1.764 euro në Gjermani dhe 2.723 euro në Finlandë. Gjermania mblodhi 34.2 miliardë euro të ardhura nga TVSH-ja për shitjen e automjeteve, servisin, riparimin dhe pjesët, si dhe taksat e shitjes dhe regjistrimit. Kjo shifër ishte pak mbi 20 miliardë euro në Francë dhe Itali në 2022. Danimarka, Suedia dhe Finlanda grumbulluan mbi 2 miliardë euro në këtë kategori ndërsa Greqia 1.2 miliardë euro dhe Irlanda 1.5 miliardë euro. Taksa totale nga automjetet pothuajse 400 miliardë euro në 13 vende të BE-së

Automjetet grumbullojnë 374.6 miliardë euro të ardhura tatimore për trembëdhjetë vende të BE-së. Përveç taksave të shitjes dhe regjistrimit, kjo shifër përfshinte taksat vjetore të pronësisë dhe më e rëndësishmja, taksat nga karburantet dhe lubrifikantët. Të dhënat e OECD-së tregojnë se Turqia ishte më e jashtëzakonshme në taksimin e automjeteve në të gjitha kategoritë në vitin 2022.

Në nivel global, transporti është përgjegjës për 25% të emetimeve direkte të CO2 nga djegia e karburantit në vitin 2018. Ndërkohë, në 17 prej anëtarëve të OECD-së në Europë, emetimet e CO2 merren drejtpërdrejt në konsideratë për të përcaktuar nivelin e taksimit. Në vitin 2022, disa vende europiane si Franca, Gjermania, Italia dhe Suedia dhanë një “bonus” për blerësit e automjeteve të përzgjedhura me emetim të ulët ose aspak CO2. Një tarifë shtesë u vendos për automjetet me emetim të lartë të CO2 në disa vende, përfshirë Belgjikën, Francën, Italinë dhe Suedinë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.