Cilit shtet i pagoi Britania 240 milionë paund për planin e kontestuar të zhvendosjes së emigrantëve?!

Britania i pagoi Ruandës 100 milionë paund shtesë (126 milionë dollarë) në prill, mbi 140 milionë paund që dërgoi më parë, pasi fatura për planin e saj të kontestuar për të zhvendosur azilkërkuesit në vendin e Afrikës Lindore vazhdon të rritet. Skema e Ruandës është në qendër të strategjisë së kryeministrit britanik Rishi Sunak për të penguar emigrantët e paligjshëm, por ende asnjë nuk është zhvendosur atje për shkak të betejave ligjore që nga shpallja e skemës në 2022.

Politika përçarëse shihet tani si një kërcënim për udhëheqjen e Sunak – me zgjedhjet që priten vitin e ardhshëm pasi ministri i tij i imigracionit dha dorëheqjen këtë javë. Në krye të 240 milionë paundëve që Britania i ka dërguar Ruandës, Londra gjithashtu do t’i paguajë vendit të Afrikës Lindore 50 milionë paund shtesë vitin e ardhshëm, sipas një letre të publikuar nga ministria e brendshme britanike të enjten.

Zbulimet në lidhje me koston në rritje të një politike që ekspertët ligjorë kanë paralajmëruar se mund të dështojë, u kritikuan nga Partia Laburiste e opozitës dhe ka të ngjarë të tërheqin kritika të reja nga disa ligjvënës brenda partisë së Sunak. “Britania nuk mund të përballojë më shumë nga ky kaos dhe farsë e kushtueshme konservatore,” tha ministrja e brendshme e laburistëve Yvette Cooper në platformën e mediave sociale X.

Por ministri i ri për emigracionin legal, Tom Pursglove, justifikoi atë që ai e quajti “investim” prej 240 milionë paund, duke thënë se sapo politika e Ruandës të vinte në zbatim dhe të funksiononte, ajo do të kursente në koston e strehimit të azilkërkuesve në MB. “Kur mendoni se ne po shpenzojmë në mënyrë të papranueshme 8 milionë paund në ditë në sistemin e azilit për momentin, është një pjesë kyçe e strategjisë sonë për të ulur këto kosto”, tha Pursglove për Sky News.

Paratë e dërguara në Ruandë do të ndihmonin zhvillimin e saj ekonomik dhe do të aktivizonin partneritetin e azilit me Mbretërinë e Bashkuar, shtoi Pursglove. Pagesat për Ruandën nuk ishin të lidhura me një traktat që të dy vendet nënshkruan të martën, thuhej në letrën e ministrisë së brendshme.

Traktati kërkon t’i përgjigjet një vendimi të Gjykatës së Lartë të Britanisë se skema e dëbimit do të shkelte ligjet ndërkombëtare të të drejtave të njeriut të parashikuara në legjislacionin vendas. “Qeveria e Ruandës nuk kërkoi asnjë pagesë në mënyrë që të nënshkruhet një Traktat dhe as nuk u ofrua”, thuhej në letër.

Sunak u bëri thirrje ligjvënësve të tij konservatorë të enjten që të bashkohen pas planit të tij të Ruandës pasi Robert Jenrick dha dorëheqjen si ministër i imigracionit të mërkurën, duke thënë se projekt-legjislacioni i urgjencës i qeverisë për të vënë në funksion skemën nuk shkoi aq larg sa duhet.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.