Çmimet e produkteve bujqësore në BE, më të lira – Rënia reflektoi kontraste të forta midis produkteve individuale
Çmimet në sektorin e bujqësisë në BE-së si për prodhimet ashtu edhe për inputet që nuk lidhen me investimet ranë në tremujorin e tretë të 2023, duke konfirmuar kthesën nga rritja e fortë e çmimeve përgjatë 2021 dhe 2022. Këto të dhëna të fundit sugjerojnë një ulje të mëtejshme të tregjeve globale bujqësore pas një periudhe ndërprerjeje.
Çmimi mesatar i produkteve bujqësore që fermerët marrin në portën e fermës ra me 9% në tremujorin e tretë të 2023 krahasuar me të njëjtin tremujor të vitit 2022. Gjithashtu ka pasur një përshpejtim të shkallës së rënies së çmimit të inputeve bujqësore që nuk lidhen me investimet nga -5% në tremujorin e dytë të 2023 në -11% në tremujorin e tretë.
Rritja e çmimeve të prodhimit bujqësor arriti kulmin në tremujorin e tretë të 2022-shit, +30% krahasuar me të njëjtin tremujor të 2021-shit. Më pas pati një ngadalësim të dukshëm të rritjes së çmimeve deri në rënien në tremujorin e tretë të 2023-shit: +26% në tremujorin e katërt të 2022-shit, +17% në tremujorin e parë të 2023-shit dhe +2% në tremujorin e dytë të këtij viti.
Rënia e përgjithshme e çmimit të produkteve bujqësore në tremujorin e tretë të 2023 reflektoi kontraste të forta midis produkteve individuale. Çmimi mesatar i drithërave ra me rreth një të tretën -32%. Çmimi i qumështit gjithashtu u ul ndjeshëm me 15%, dhe pati rënie më të moderuara për frutat -5% dhe shpendët -3% midis produkteve të tjera.
Në të kundërt, pati edhe disa rritje të mprehta të çmimeve në tremujorin e tretë të 2023-shit: rritja më e madhe ishte për vajin e ullirit +73% krahasuar me të njëjtin tremujor të 2022-shit, e ndjekur nga patatet +48% dhe panxhar sheqeri +44%.
Ndër inputet që nuk lidhen me investimet, ritmet më të mprehta të rënies së çmimeve ishin për plehrat kimike -36%, energjinë dhe lubrifikantët -18% dhe ushqimet për kafshët -12%.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.