“Dietë verore” për shtresat në nevojë! – Paketa antikrizë për 434 mijë individë shtyhet në Shtator

Ndihma prej 3 mijë lekësh e dhënë për 434 mijë qytetarë në nevojë dhe pensionistë në funksion të kompensimit të rritjes së çmimeve përfundon më 30 Qershor dhe qeveria ka vendosur që për dy muajt e verës Korrik-Gusht ti lërë “zbuluar”këto shtresa. Edhe pse Ministria e Financave pohoi se do të rishikohej buxheti në funksion të nevojave që kanë këto kategori, burime zyrtare nga qeveria thonë se është vendosur që ta shtyhet kjo vendimmarrje për në muajin shtator.

Paketa e rezistencës sociale që targeton familjet me ndihmë ekonomike, pensionistë të invaliditetit, pensionistët që jetojnë vetëm, personat me aftësi të kufizuar, paraplegjikë, tetraplegjikë apo të verbër, ku parashikohet që të aplikohet  si kompensimi i rritjes së çmimeve të shportës e njëjta masë mbështetje për 3 mijë lekësh në muaj deri në fund të vitit u vu në jetë për 3 muaj dhe çdo individ përfitoi në total 9 mijë lekë dhe fondi i vënë në dispozicion vetëm për këtë zë ishte 3.9 miliardë lekë.

Nga bonusi u përjashtuan mbi 231 mijë pensionistë që marrin pension më të lartë se gjysma e pagës minimale.  Burimet nga Financat theksojnë se të ardhurat shtesë vetëm nga rritja e çmimeve në buxhet përgjatë 5 muajve të parë të vitit janë 13 miliardë lekë, ndërkohë që deri më tani janë alokuar afro 6 mld lekë në total për paketën anti-krizë dhe 20 miliardë lekë janë vënë në dispozicion si garanci për kompensime të energjisë elektrike në mënyrë që të mos rritej çmimi i energjisë për konsumatorët familjarë, fond i cili nuk është ezauruar.

Nëse kjo paketë do të shtyhej për gjysmën e dytë të vitit, buxhetit të shtetit do ti kushton shtresat në nevojë përfitues 7.8 miliardë lekë në total apo 18 mijë lekë për individ.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.