Dollari i qëndrueshëm ul çmimin e naftës – Reduktimet e furnizimeve ruse “tkurrin” tregun
Çmimet e naftës shënuan rënie, pasi një dollar më i fortë dhe frika e recesionit rrezikojnë të kompensojnë fitimet që vijnë nga planet e Rusisë për të thelluar reduktimet e furnizimit me naftë.
Kontratat e së ardhmes së naftës së papërpunuar të Teksasit Perëndimor u tregtuan me 75.98 dollarë për fuçi, 34 cent më pak, ndërsa kontratat e së ardhmes Brent u ulën me 48 cent, në 82.68 dollarë për fuçi.
Dollari qëndroi pranë një piku prej shtatë javësh të hënën, pasi një mori të dhënash të forta ekonomike të SHBA-së përforcuan pikëpamjen se Rezervës Federale do t’i duhet të rrisë më tej dhe për një kohë më të gjatë normat e interesit. Një dollar i fortë i bën mallrat me çmim në monedhën amerikane më të shtrenjta për përdoruesit e monedhave të tjera.
Frika e një politike të ashpër të FED u kthye në plan të parë të premten pasi indeksi i çmimeve të shpenzimeve të konsumit personal – PCE, u rrit me 0.6% muajin e kaluar pasi fitoi 0.2% në dhjetor.
Duke shtuar presionin në rënie, inventarët e naftës së papërpunuar në SHBA u rritën në nivelin më të lartë që nga maji 2021 javën e kaluar, sipas të dhënave nga Administrata e Informacionit të Energjisë.
Nga ana e ofertës, Rusia planifikon të ulë eksportet e naftës nga portet e saj perëndimore deri në 25% në mars kundrejt shkurtit, duke tejkaluar reduktimet e prodhimit të njoftuara më parë prej 5%.
Çmimet e naftës kanë rënë me rreth 1/6 në vit që nga 24 shkurt 2022, kur trupat ruse marshuan për herë të parë në Ukrainë.
Dy javë pas pushtimit, çmimet u rritën në një nivel rekord, prej afro 128 dollarë për fuçi për shkak të shqetësimeve për furnizimin, por që atëherë janë ftohur nga frika e një ngadalësimi ekonomik global.
Rusia ndaloi furnizimet me naftë në Poloni përmes tubacionit Druzhba, një ditë pasi Polonia dorëzoi tanket e saj të parë ‘Leopard’ në Ukrainë. Investitorët po përgatiten për anketat e prodhimit të Kinës këtë javë, për të caktuar një drejtim të qartë mbi kërkesën për naftë. Kina zhvillon mbledhjen e saj vjetore parlamentare këtë fundjavë për të vendosur objektiva dhe politika të reja ekonomike.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.