Edhe zvicra rrit normën e interesit – Për herë të parë në 15 vite për të frenuar zgjerimin e inflacionit

Banka Kombëtare e Zvicrës rriti të enjten normën bazë të interesit për herë të parë në 15 vjet, duke u bashkuar me bankat e tjera qendrore në shtrëngimin e politikës monetare për të luftuar inflacionin. Banka qendrore rriti normën e saj të politikës monetare në -0.25% nga niveli -0.75% që ishte vendosur që nga viti 2015.

Lëvizja pasoi një rritje prej 0.75% të normës bazë nga Rezerva Federale e SHBA të mërkurën, ndërsa Banka Qendrore Europiane sinjalizoi javën e kaluar se do të rriste normat e saj në korrik për të kontrolluar inflacionin në rritje në eurozonë, i cili arriti në 8.1% muajin e kaluar.

“Politika më e shtrënguar monetare synon të parandalojë përhapjen më të gjerë të inflacionit në mallra dhe shërbime në Zvicër. Nuk mund të përjashtohet që rritje të mëtejshme të normës së politikës së bankës do të jenë të nevojshme në të ardhmen për të stabilizuar inflacionin në intervalin në përputhje me stabilitetin e çmimeve në periudhë afatmesme”, tha ajo në një deklaratë.

Banka Qendrore rriti parashikimet e saj të inflacionit për vitin 2022 në 2.8% nga 2.1% që dha në mars. Ajo gjithashtu pret inflacion prej 1.9% dhe 1.6%, përkatësisht në vitet 2023 dhe 2024. Banka Qendrore pret që ekonomia zvicerane të rritet me rreth 2.5% në 2022.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.