Ekonomitë e Gjermanisë dhe Francës janë në vështirësi – Panorama është shumë më negative se ajo e pjesës tjetër të Eurozonës

Ekonomitë e Gjermanisë dhe Francës janë në vështirësi. Ato tregojnë një pamje shumë më të keqe në krahasim me pjesën tjetër të Eurozonës. Banka qendrore e Gjermanisë, Bundesbank, parashikoi se ekonomia gjermane do të tkurret më tej gjatë tremujorit të parë dhe sektori industrial do të mbetet një komponent veçanërisht i dobët.

Dy ekonomitë më të mëdha të Eurozonës, Gjermania dhe Franca, po marrin frymë teksa përpiqen të kthejnë faqen dhe t’i shpëtojnë recesionit. Megjithatë, ato mbeten të mbyllura në norma negative, siç dëshmohet nga të dhënat e marsit, të cilat e bëjnë të qartë se do të kalojë pak kohë para se të rikuperohen.

Sipas një studimi të lidhur me S&P Global të bizneseve europiane, sektori privat i Francës u tkurr në mars dhe pak më shumë se në shkurt. Në të njëjtën periudhë, ekonomia e Gjermanisë u ngadalësua, por më pak se muajin e kaluar. Arsyeja megjithatë ishte ekskluzivisht sektori i shërbimeve i cili tenton të stabilizohet. Industritë kryesore të Gjermanisë sfiduan edhe një herë shpresat e ekonomistëve se do të rimëkëmbeshin në mars. Në të gjithë Eurozonën, sektori i shërbimeve e çoi aktivitetin e përgjithshëm ekonomik të sektorit privat në nivelet më të larta në nëntë muaj. Megjithatë, sektori i prodhimit ra në mënyrë të papritur në nivelet më të ulëta të tre muajve të fundit.

Duke komentuar të dhënat zhgënjyese për prodhimin, analistët theksojnë se kushdo që shpresonte të shihte një rimëkëmbje në sektorin e prodhimit në tremujorin e parë të vitit, duhet ta harrojë atë. Të dhënat e muajit mars konfirmuan gjendjen anemike të sektorit, i cili në nivel europian duket se dominohet nga “artileria e rëndë” e Gjermanisë. Lidhur me krahasimin mes dy ekonomive më të mëdha europiane, Francës dhe Gjermanisë, të dhënat konfirmojnë pak a shumë të njëjtën shkallë dobësie në të dyja.

Është fakt se kohët e fundit dy ekonomitë më të mëdha të Europës janë duke ecur shumë më keq në krahasim me pjesën tjetër të Eurozonës. Edhe ekonomitë e vendeve si Spanja, të cilat janë goditur nga kriza të mëdha në të kaluarën, po tregojnë rritje të jashtëzakonshme. Gjermania tashmë ka rrëshqitur në recesion pas tkurrjes që përjetoi në tremujorin e katërt të vitit të kaluar dhe nga e cila po përpiqet të dalë nga fillimi i vitit 2024.

Për ekonominë e dytë më të madhe të Eurozonës, Francën, përkeqësimi është për shkak të rënies së kërkesës për mallra dhe shërbime. Siç thekson S&P Global në raportin e tij përkatës për Francën, të anketuarit përmendin si faktorë rëndues “ngurrimin e klientelës, kushtet shqetësuese në ekonomi dhe presionet inflacioniste”. Megjithatë, ka një përmirësim në besimin e biznesit si në industri ashtu edhe në shërbime. Në dy ekonomitë më të mëdha europiane, presionet inflacioniste po përshkallëzohen.

Megjithatë, rritja e pagave është një burim shqetësimi, veçanërisht në kompanitë në sektorin e shërbimeve, ku kostot e punës luajnë një rol më vendimtar.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.