Elbasan-Qafë Thanë, hapet tenderi 23.7 mln euro – FAZA III/ Aksi është pjesë e korridorit VIII, gjatësia 11.26 km

Me një fond limit prej 2.5 mld lekë apo 23.7 mln euro, Autoriteti Rrugor Shqiptar ka hapur tenderin për fazën e tretë të aksit rrugor Elbasan – Qafë Thanë, që është pjesë e korridorit 8. Ky segment fillon në Labinot Fushë dhe përfundon në urën e Murashit, me një gjatësi totale prej 11.26 km. Ndërkaq, referuar dokumenteve të tenderit kompania që do të fitojë garën do të duhet të kryejë edhe asfaltimin e 2 segmenteve të tjerë, ku aktualisht po kryehen punimet.

Për këto 2 lote procedurat tendeurese janë kryer më herët, teksa pjesë e kontratave të lidhura nuk kanë qenë të përfshira punimet për asfaltimin. Rruga kombëtare Elbasan – Qafë Thanë është pjesë e korridorit Tiranë-Elbasan-Librazhd-Pogradec-Korçë, që lidh zona me shumë rëndësi në drejtim të turizmit.

Ndërkohë që, si pjesë e korridorit 8, ky aks lidh Shqipërinë me Greqinë, Maqedoninë apo Bullgarinë. Aktualisht, sipas dokumtenteve të tenderit, trafiku në këtë segment rrugor arrin kulmin sidomos përgjatë periudhës së dimrit dhe verës, duke qene se përveç trafikut lokal shtohet ndjeshëm numri i mjeteve të turistëve të ndryshëm që frekuentojnë këto zona. Ndërkaq, përveç tenderit për fazën III, ARRSH ka gati edhe hapjen e tenderit për fazën IV, me një fond limit prej 2.5 mld lekë.

Në total, gjatësia e rrugës nga Elbasani në Qafë Thanë është 50.12 km, por të paktën për 1 segment nuk ka nisur ende as faza e projektimit, duke qenë se aktualisht është duke u zhvilluar tenderi për këtë qëllim. Bëhet fjalë për segmentin nga Bushtrica, deri në pikën e re doganore me Maqedoninë e Veriut, duke qenë se tashmë është dakordëusar se rruga nuk do të kalojë nga pika kufitare e Qafë – Thanës.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.