Elektrifikimi i hekurudhës Durrës-Pogradec – Rihapet tenderi për projektimin, fondi limit 450 000 euro
Ola Mitre / SCAN
Linja hekurudhore e korridorit VIII, që fillon në Durrës dhe përfundon në Pogradec do të jetë elektrike, por tenderi që synon gjetjen e kompanisë së do të hartojë projektin nuk është finalizuar ende. Procedura u hap nga Hekurudha Shqiptare në prill të këtij viti në faqen e prokurimeve publike të Bashkimit Evropian, teksa afati i fundit për pranimin e ofertave ishte 3 qershori.
Por, pas kësaj procedure janë hapur edhe 2 tenderë të tjerë me të njëjtin objekt, duke sugjeruar se kontraktori nuk është përzgjedhur ende. Ndërkaq, tenderi i fundit i rishpallur përcakton se ofertat e kompanive të interesuara do të pranohen deri në datën 4 tetor.
Por ndryshe nga 2 tenderët e parë, ku tipi i procedurës ishte i kufizuar vetëm për kompanitë që do të ftoheshin të ofertonin, në tenderin që është aktiv tipi i procedurës është “i hapur”, çka do të thotë se të gjitha kompanitë e interesuara mund të dorëzojnë ofertë.
Fondi limit për projektimin e elektrifikimit të kësaj linje hekurudhore është 450 mijë euro, teksa projekti financohet përmes një granti nga Korniza e Investimeve të Ballkanit Perëndimor. Sipas të dhënave të publikuara, konsulenti do të duhet të kryejë matje në terren ndërmjet Durrësit dhe Pogradecit, duke bashkëpunuar me entin prokurues dhe autoritetet përkatëse kombëtare dhe vendore. Ndërkohë që, projekti do të duhet të jetë gati brenda 12 muajsh nga nënshkrimi i kontratës.
Linja hekurudhore e projektit të rehabilitimit ndjek atë ekzistuese dhe pas përfundimit të punimeve parashikohet që trenat të kenë një shpejtësi 120 kilometra/orë. Korridorit VIII hekurudhor nis nga Durrësi në Pogradec, ku lidhet me Maqedoninë e Veriut, në fshatin Lin.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.