Energjia e rinovueshme “ndriçon” futbollin – Holandë, ndeshja zhvillohet tërësisht me energji të gjelbër

Kristi Ceta/SCAN

 

Një paketë baterie 8.6 MWh e instaluar në Johan Crujiff Arena, stadiumi i klubit të futbollit Ajax në Holandë, ishte thelbësore për ndriçimin e një ndeshjeje futbolli me energji të rinovueshme.

Dritat e stadiumit gjatë ndeshjes së futbollit, ndriçimi në tunelin e lojtarëve, ashensorët u ndezën duke përdorur energji të qëndrueshme gjatë një ndeshjeje të fundit. Ky është vetëm fillimi pasi stadiumi, që organizon edhe ngjarje të tjera, ka plane më ambicioze për përdorimin e energjisë.

Johan Crujiff Arena, i vendosur në kryeqytetin e Amsterdamit, tashmë ka 4200 panele diellore të instaluara në çatinë e vet. Në vitin 2018, autoritetet instaluan një sistem baterie 3 MW për të ruajtur energjinë e rinovueshme. Karakteristika unike e këtij sistemi të ruajtjes së baterive ishte përdorimi i baterive të përdorura.

Në atë kohë, ky sistem ishte projekti më i madh në Evropë për t’u dhënë një jetë të dytë automjeteve elektrike dhe baterive të përdorura dhe i pari që u përdor për një aplikim komercial. Që atëherë, stadiumi i futbollit ka bërë përparime të mëtejshme në fuqizimin e funksioneve të tij me energji më të pastër.

Arena tashmë blen energji të gjelbër nga turbinat e erës të instaluara në fshatin e afërt të Oudendijk dhe në një park tjetër diellor të ndërtuar në vend.

Stadiumi përdor një sistem të rritjes së barit të bazuar në LED dhe gjithashtu ka vendosur ndriçim LED për të reduktuar kërkesën për energji. Kohët e fundit, ky impiant instaloi sistemin e tij të dytë me bateri, i cili rrit kapacitetin e kombinuar të ruajtjes në 8.6 MWh, i mjaftueshëm për të fuqizuar 20,000 shtëpi për një orë.

Me një kapacitet kaq të lartë energjetik të instaluar, autoritetet e Arenës planifikuan të përdornin vetëm energjinë e gjelbër për të zhvilluar ndeshjen e parë të ekipit vendas në ligën kombëtare, Eredivisie.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.