Euro tenton të japë “shenja jete” -Rritet lehtë pasi preku të hënën nivelin më të ulët. Ndikimet në ekonominë

Tregu i këmbimit valutor vendas po përjeton sërish luhatje të forta të çmimit të monedhave të huaja kundrejt lekut shqiptar. Pasi regjistroi të hënën vlerën më të ulët të këtij viti kundrejt lekut prej 100,78, referuar kursit mesatar të Bankës së Shqipërisë, monedha e përbashkët europiane është ringritur lehtë duke u këmbyer të martën me 101,03 lekë. Të njëjtën ecuri kanë regjistruar edhe valutat e tjera.

Nënçmimi i valutave, por kryesisht i euros ndaj lekut, ka dhënë efektet në ekonominë shqiptare.

Një pjesë e madhe e familjeve shqiptare e sigurojnë jetesën nëpërmjet remitancave që vijnë nga të afërmit e tyre që jetojnë jashtë vendit, kryesisht nga Italia dhe Greqia. Ky grup ndikohet duke qenë se vlera e të ardhurave të mbërritura në Shqipëri nuk ka më të njëjtën peshë si më parë kur konvertohet në lek.

Sipas të dhënave nga Banka e Shqipërisë, emigrantët shqiptarë dërguan rreth 930 milionë euro gjatë vitit 2022, niveli më i lartë që prej 2008-s. Duke pasur parasysh tendencën rritëse të vlerës së remitancave, zhvlerësimi i euros bën që familjet shqiptare të përfitojnë më pak nga paratë e dërguara nga të afërmit në emigrim.

Rënia e euros prek drejtpërsëdrejti eksportet, pasi bizneset kanë kontrata që janë kryesisht në euro dhe një kontratë për të njëjtën vlerë në euro, por e konvertuar në lek vlen më pak. Referuar Institutit të Statistikave, në shkurt të këtij viti eksportet e mallrave arritën vlerën 32 miliard lekë, duke u rritur me 7,9 %, në krahasim me janarin.

Sa i takon importeve, si rrjedhojë e zhvlerësimit të euros, bizneset shqiptare mund të importojnë mallra me çmime më të lira dhe t’i tregtojnë në vend me çmime normale në monedhën kombëtare, pasi pavarësisht kursit të këmbimit, në tregun e konsumit nuk është vënë re ulje shumë e madhe çmimesh. Kjo bën që bizneset të fitojnë më shumë.

Importet janë shumë të rëndësishme për Shqipërinë, pasi përbëjnë pjesën më të madhe të bilancit të pagesave. Individët që kanë të ardhurat në lek mund të përfitojnë nga ulja e çmimit të mallrave të importit, nëse bizneset shqiptare e reflektojnë këtë fakt edhe në cmimet e produkteve. Si rezultat, gjatë vitit të shkuar qytetarët kanë shtuar blerjet e ushqimeve e pijeve të importit. Gjithsesi, kanë qenë makineritë, pajisjet e pjesët e këmbimit që kanë shënuar një bum të vërtetë.

Ndërkohë, edhe qeveria ka përfituar nga nënçmimi i euros pasi borxhi i jashtëm në pjesën më të madhe është në monedhën e përbashkët europiane, e cila që prej vitit të kaluar e deri më sot kushton më lirë.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.