Euro, valuta e vetme për transaksione në Kosovë – Përfundon periudha tranzitore e BQK-së për dinarin serb

Ka përfunduar të shtunën periudha tranzitore e Bankës Qendrore të Kosovës për përdorimin e dinarit serb në vend, ndërsa nga e hëna të gjitha transaksionet do të kryhen vetëm në monedhën kombëtare që është euro. Gjithashtu, do të nisin penalitetet ndaj gjithë atyre që përdorin valuta të tjera për transaksione me para të gatshme.

Që nga fillimi i vitit, Banka Qendrore e Kosovës u ka kërkuar bankave tregtare të hapin degë të reja në veri të vendit. Referuar rregullores së Bankës Qendrore, duke nisur nga 12 maji valutat e tjera mund të përdoren si vlera për ruajtje në formë fizike, apo në llogaritë bankare në valuta jo euro, për kryerjen e pagesave ndërkombëtare në valuta jo euro dhe për aktivitetet e këmbimit valuator.

Zbatimi i rregullores sidomos në veri të vendit vlerësohet se mund të jetë sfidues.

Rregullorja e re Bankës Qendrore të Kosovës për pagesat vetëm me euro fillimisht hyri në fuqi më 1 shkurt të këtij viti. Por, për shkak të një reagimi të madh nga Serbia, BE dhe SHBA, zbatimi i saj u bë përmes një tranzicioni të lehtësuar për rreth 3 muaj. Komuniteti ndërkombëtar gjithnjë ka kërkuar që Kosova të shtyjë zbatimin e këtij vendimi, duke argumentuar se ai “ngre shqetësime në lidhje me ndikimin në veçanti në komunitetet me shumicë serbe”.

Por, ekzekutivi kosovar theksoi se rregullorja e BQK-së nuk nënkupton se do të ndalohent transfertat e parave nga Serbia dhe po ashtu nuk nënkupton dënime financiare për posedimin e valutave të shteteve të tjera.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.