Europë, kaos në sektorin e transportit – Grevë në hekurudhat e Mbretërisë së Bashkuar dhe aeroportet belge

Grevat e personelit të transportit, vonesa në linja, anulim udhëtimesh dhe pakënaqësi të pasagjerëve. Është vërtet kaotike situata e transportit në Europë për shkak të një seri grevash, në javën e samitit europian në Bruksel, duke filluar nga ajo e personelit të hekurudhave në Mbretërinë e Bashkuar pas dështimit të negociatave mes sindikatave, rrjetit hekurudhor shtetëror dhe kompanive private të sektorit.

Grevistët kërkojnë një rritje të barabartë pagash dhe garanci që vendet e punës do të jenë të sigurta dhe në të ardhmen, duke i konsideruar si dy gjëra shumë të rëndësishme sidomos për ata që kanë dhe familje për të mbajtur.

Greva e kësaj jave ka përfshirë 40 mijë nëpunës, si makinistë, sanitarë, mirëmbajtës të stacioneve etj. Greva është cilësuar si më e madhja në 30 vitet e fundit në Mbretërinë e Bashkuar.

Ndërsa në Belgjikë grevat kanë bllokuar fluturimet. Në Bruksel sindikatat që përfaqësojnë personelin e bordit dhe pilotët e Bruksel Airlines kishin paralajmëruar grevë për datat 23. 24 dhe 25 qershor. Kompania ajrore u detyrua të anulojë 315 fluturime që prekën 40 mijë pasagjerë.

Kompania ajrore belge deklaroi se bisedimet me palët sociale nuk përfunduan me një marrëveshje, dhe theksoi se në muajt e fundit janë ndërmarrë iniciativa të ndryshme për të lehtësuar ngarkesën e madhe të punës të personelit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.