Faturimi online për ujin – UKT hap tenderin 144.3 mln lekë për përmirësimin e sistemit aktual

Përmirësimi i shërbimit të faturimit online pritet t’i kushtojë 144.3 mln lekë Ujësjellësit të Tiranës. Kompania ka hapur tenderin, mbi kufirin e lartë monetar që synon përmirësimin e mëtejshëm të sistemit të faturimit Al-Billing dhe sigurimin e vijimësisë së punës për administrimin e abonentëve.

Po ashtu, synohet përmirësimi i pagesave me palët e treta ku specifikohet se lidhja me bankat duhet të mundësojë edhe marrjen automatike te konfirmimeve të pagesave, të realizuara ne bankë. Nga ana tjetër, konsulenti që do të fitojë tenderin do të duhet të mundësojë edhe përmirësimin e procesit të administrimit dhe kontrollit të të dhënave dhe raportimit.

Sipas dokumenteve të tenderit, përveç përmirësimit të modulit të administrimit të abonentëve, duke mundësuar kontrollet e nevojshme si dhe shtuar informacionin e nevojshëm, një tjetër rezultat që do të arrihet është edhe përmirësimi i modulit të administrimit të tarifave, duke e sjellë në linjë me administrimin e saktë të tarifave dhe taksave, që janë pjesë e faturës së ujit.

Gjithsesi, edhe sistemi actual i faturimit Al-Billing mundëson llogaritjen e taksave dhe tarifave vendore sipas zonave, duke i shfaqur ato në sistem për faturim dhe akëtim. Paralelisht, përdoret edhe sistemi i administrimit dhe regjistrimit të informacionit të abonentëve për taksat vendore nëpërmjet programit mobile, një program Android dhe modul administrimi web.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.