“Frenon” industria në Francë – Banka Qendrore: Rritja e çmimeve të energjisë po ndikon gjithnjë e më shumë

Zgjerimi i aktivitetit industrial francez është ndalur përballë shtimit të pasigurisë dhe rritjes së çmimeve të energjisë, sipas anketës mujore të biznesit të Bankës së Francës. Sondazhi i bankës qendrore me 8,500 sipërmarrje tregoi një stabilizim në shtator në vend të një rritjeje të lehtë siç pritej më parë. Administratorët e bizneseve të industrisë parashikojnë një tjetër stanjacion në tetor dhe raportuan një përkeqësim të mëtejshëm në mes të rritjes së kostove të energjisë. Sektorë të tillë si kimikatet dhe çeliku, që konsumojnë më shumë energji, po vuajnë më shumë.

Ndërsa tabloja për shërbimet është më optimiste, ritmi i rritjes së aktivitetit do të ngadalësohet këtë muaj, sipas anketës. Banka e Francës shkurtoi vlerësimin e saj të rritjes ekonomike për tremujorin e tretë në 0.25%, nga 0.3%.

Ekonomia franceze kishte treguar elasticitet më të madh në fillim të vjeshtës, pas rritjes së fortë në tremujorin e dytë. Por, rritja e zgjatur e çmimeve të energjisë po vështirëson punën e fabrikave dhe po teston kufijtë e masave të qeverisë për të zbutur kostot më të larta. Agjencia e statistikave tha javën e kaluar se pret që rritja ekonomike të zbehet në zero në tremujorin e fundit të vitit.

Banka Qendrore i qëndroi parashikimit për një rritje prej 2.6% këtë vit, e ndjekur nga një ngadalësim vitin e ardhshëm midis një tkurrjeje prej 0.5% dhe një zgjerimi prej 0.8%. Perspektiva supozon një tremujor të katërt të këtij viti të qëndrueshëm.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.