Gjykatat, të detyruara t’i japin informacion çdo personi – Udhëzuesi: Çdo individ ka të drejtë të kërkojë të dhëna pa shpjeguar motivet

Një udhëzues i sapomiratuar nga Këshilli i Ministrave detyron Gjykatat t’i japin informacionin që përcakton ligji, jo vetëm mediave, çdo personi të interesuar. Udhëzuesi standard për marrëdhëniet e gjykatës me publikun e median përcakton se ccdo person gëzon të drejtën e njohjes me informacionin publik që administrohet nga gjykata, pa u detyruar të shpjegojë motivet.

“Çdo person ka të drejtë të njihet me informacionin publik, nëpërmjet dokumentit origjinal, ose duke marrë një kopje të tij në formën ose formatin që mundëson akses të plotë në përmbajtjen e dokumentit”, thekson Udhëzuesi, duke nënvizuar më tej se “Gjykata është e detyruar të informojë kërkuesin nëse ka ose jo në zotërim informacionin e kërkuar”.

Ndërkaq, Informacioni publik që i është dhënë një personi, nuk mund t’i refuzohet asnjë personi tjetër që e kërkon atë, me përjashtim të rastit kur informacioni përmban të dhëna personale të subjektit, në përputhje me rregullimet e ligjit “Për të drejtën e informimit”.

Sa për të dhënat me kerkesë, Udhëzuesi përcakton se informacioni mbi të dhënat personale dhe sensitive të çdo personi, ose mbi të dhënat që kanë të bëjnë me jetën private të çdokujt, mund të jepet nga gjykata vetëm pasi të vlerësohet rëndësia e të dhënës që kërkohet dhe statusi ligjor i saj.

Informacioni kërkohet duke plotësuar një formular aplikimi, i cili mund të plotësohet online në faqen e internetit të gjykatës, ose fizikisht në sportelet e shërbimit të publikut në gjykatë. Aplikimi për informacion me kërkesë i vihet në dispozicion menjëherë gjyqtarit për marrëdhëniet me publikun dhe median nga nëpunësi për marrëdhëniet me publikun dhe median.

Vlerësimi i rëndësisë së të dhënës që kërkohet dhe statusit ligjor të saj, bëhet sipas rastit nga kryetari i gjykatës ose trupi gjykues i çështjes konkrete.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.