Hapi i parë për lidhjen elektrike Qipro-Greqi – Vëmendja tek Izraeli. Por, a do të reagojë Ankaraja?

Në vitin 2026 pritet që projektet për Interkoneksionin ambicioz të Detit të Madh të përfundojnë me synimin e ndërlidhjes elektrike të Qipros dhe Greqisë nëpërmjet Kretës me Izraelin si sfond.

Projekti i ndërlidhjes elektrike Qipro-Greqi është një hap më afër zbatimit të tij, pasi sipas deklaratave të presidentit të organit zbatues të projektit ADMIE, tashmë i është dhënë një urdhër një kompanie specifike për ndërtimin e kabllit që do të lidhë elektrikisht Qipron me Greqinë nëpërmjet Kretës.

Ky është në thelb fillimi i punës së zbatimit të projektit ‘Great Sea Interconnector’, i cili pritet të përfundojë brenda vitit 2026. Projekti ka marrë një grant nga Agjencia Ekzekutive e Bashkimit Europian për Klimën, Infrastrukturën dhe Mjedisin, i cili arrin në 657 milionë euro

Kujtohet se pavarësisht se në fazën e parë projekti ka të bëjë vetëm me ndërlidhjen elektrike Qipro-Greqi, në shtrirjen e tij Interkoneksioni i Detit të Madh parashikon edhe ndërlidhjen e Izraelit me të dy vendet. Çështja u diskutua tërësisht në takimin trepalësh midis Qipros-Greqisë dhe Izraelit në Nikosia shtatorin e kaluar, pa arritur megjithatë një përfundim.

Megjithatë, sipas informacioneve të reja, interesi izraelit është rindezur muajt e fundit për shkak të pjesëmarrjes së shtetit grek në projekt përmes ADMIE. Megjithatë, Tel Avivi nuk pritet të shpallë vendime, nëse nuk do të ketë de-përshkallëzimin e situatës në Lindjen e Mesme.

Fillimi i punës në Interkonektorin e Detit të Madh nuk pritet të ndodhë pa reagimin turk, duke pasur parasysh planifikimin për vendosjen e një kablloje në perëndim të Qipros. Ministria e Jashtme turke vetëm pak ditë më parë denoncoi miratimin e Planit Hapësinor Detar nga qeveria qipriote, me arsyetimin se cenon të drejtat e Turqisë dhe turqve qipriotë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.