Hartohet strategji e re për sigurinë kombëtare – Në dokument përfshihen edhe sfidat apo kërcënimet për ekonominë

Këshilli i Ministrave ka dërguar për miratim në Kuvend Strategjinë e Sigurisë Kombëtare për periudhën 2023-2028. Sipas ekzekutivit, ky document pason atë të vitit 2014, që për vetë zhvillimet nuk i përgjigjet më sfidave të sigurisë me të cilat përballët aktualisht vendi ynë. Hartimi i dokumentit të ri është bërë duke pasur në konsideratë influencën e faktorëve që pasqyrojnë natyrën në zhvillim të kërcënimeve të sigurisë në ditët e sotme që lidhen me cënimin e demokracisë në shkallë globale, kërcënimet kibernetike, sigurinë ushqimore, ndryshimet klimatike etj.

Zhvillimet negative ndërkombëtare kanë thelluar më tej rivalitetin gjeostrategjik të viteve të fundit dhe përkeqësuar më tej problematikat ekzistuese ekonomiko-sociale në shkallë të gjerë, duke afektuar negativisht sferën energjetike në shkallë globale, duke sjellë tkurrje të ndjeshme të parashikimeve të rritjes ekonomike globale, shtim të inflacionit, si dhe rritje të lartë të çmimeve të lëndëve të para.

Po ashtu, këto zhvillime cënojnë rëndë sigurinë ushqimore, duke e bërë konkret rrezikun e një krize të rëndë ushqimore gjatë 2–3 viteve të ardhshme, e cila, veçanërisht në vendet e varfra, mund të ketë efekte shpërthyese social–politike me të gjitha pasojat negative të mundshme, përfshirë konflikte rajonale dhe valë të përsëritura emigracioni drejt Europës.

Situata aktuale ka krijuar në këtë mënyrë një akumulim sfidash dhe kërcënimesh, të cilat shtrihen nga dimensioni klasik i riaktualizimit të mbrojtjes ushtarake të territoreve te terrorizmi dhe përdorimi i efekteve të teknologjive në zhvillim në formë dëmtuese apo çorientuese, e deri në ndryshime klimatike e rreziqe mjedisore.

Si të tilla, ato sjellin me vete një paparashikueshmëri të lartë, si dhe vështirësi objektive për përballimin e tyre efektiv në nivel thjesht kombëtar. Këto efekte negative prekin edhe vendin tonë, por, krahas tyre,siguria e vendit është përballur ndërkohë me theksimin eksponencial të disa kërcënimeve të mprehta, si p.sh. sulmet kibernetike të verës së kaluar ndaj sistemeve tona on-line apo përpjekjet për infiltrim agjenturor dhe influencim financiar të fuqive të huaja jomiqësore ndaj vendit tonë.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.