Hekurudha ndahet në dy shoqëri aksionare – Pr/ligji: Synohet përafrimi me BE dhe thithja e më shumë investimeve

Sektori hekurudhor shqiptar do të ndahet në dy shoqëri aksionare, Administratori i Infrastrukturës Hekurudhore dhe Sipërmarrësi Hekurudhor. Kështu është përcaktuar në projektligjin më të fundit të nxjerrë për konsultim publik. Ky ndryshim bëhet në kushtet kur hekurudha shqiptare po shihet si një sektor strategjik zhvillimi dhe Bashkimi Evropian kërkon rregullimin në përputhje me legjislacionin e saj, me qëllim nxitjen investimeve të huaja dhe projekteve të financuara nga BE.

Në ligjin e vitit 2021, Hekurudha Shqiptare SH.A. parashikohej të menaxhohej nga katër shoqëri pritëse, Sh.A. për Infrastrukturën Hekurudhore, për Transportin e Udhëtarëve, për Transportin e Mallrave dhe për Mirëmbajtjen e Mjeteve Lëvizëse. Për arsye të kostos së madhe të krijimit të katër shoqërive, mungesës së burimeve njerëzore dhe ekspertëve për secilën prej tyre, funksionimit dhe menaxhimit të tyre në praktikë, është vendosur që Hekurudha Shqiptare SH.A. të ndahet në vetëm dy shoqëri aksionare.

Administratori i Infrastrukturës Hekurudhore do të ketë nën administrim shinat dhe stacionet dhe do të mundësojë veprimtarinë e çdo transportuesi hekurudhor, privat apo shtetëror, të huaj apo vendas, për transport mallrash apo pasagjerësh. Ndërsa Sipërmarrësi Hekurudhor do ketë për detyrë sigurimin e transportit, si dhe mirëmbajtjen e mjeteve lëvizëse.

Pas marrjes së rekomandimeve në takimin Screening me Bashkimin Evropian dhe eksperiencës së vendeve fqinje me transportin hekurudhor, ndarja në dy shoqëri aksionere synon të përmbushë kërkesat e Direktivës së BE për krijimin e një zone të vetme evropiane hekurudhore, të bëjë efektive dhe të zbatueshëm dispozitat e Kodit Hekurudhor, të rregullojë organizimin dhe funksionimin me qëllim rigjallërimin e këtij sektori dhe të tërheqë investimet.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.