Hekurudhat ‘rikthejnë’ Shkozetin – Masterplan për modernizimin e reparteve të mirëmbajtjes së trenave

Hekurudha Shqiptare po planifikon rindërtimin dhe funksionimin e Depot-it së trenave në Shkozet.

Synimi është që në vitin e ardhshëm ky vend të shërbejë për mirëmbajtjen e mjeteve hekurudhore përmes krijimi të një qendre të specializuar.

Për këtë qëllim është shpallur edhe tenderi me fond limit rreth 13 milionë lekë për Hartimin e Projektit Konceptual Arkitektonik dhe Inxhinierik për Rehabilitimin e Reparteve të Mirëmbajtjes së Mjeteve Hekurudhore në Shkozet.

Ky proces përfshin studimin, rikonfigurimin dhe modernizimin e infrastrukturës së depotit, si dhe përdorimin e teknologjive të reja për të rritur efikasitetin dhe sigurinë e operacioneve.

Ky Masterplan duhet të ketë parasysh dhe rritjen/zmadhimin e flotës së trenave, si rrjedhojë e rritjes së kapaciteteve të linjës Durrës-Tiranë, si dhe linjës Vorë-Hanin i Hotit, Durrës – Rrogozhinë, etj.

Depoja ekzistuese e mirëmbajtjes së mjeteve hekurudhore Shkozet është ndërtuar në vitin 1947 dhe ndodhet në jug të stacionit hekurudhor të Durrësit. Ajo ka një sipërfaqe totale prej rreth 11 mijë e 850 metra katrorë.

Aktualisht në vend po zbatohet një program investimesh të rëndësishme për modernizimin e rrjetit hekurudhor. Për financimin e projekteve hekurudhore në vend një mbështetje e konsiderueshme është marrë nga projektet e Bashkimit Europian, të cilat synojnë ndërlidhjen e infrastrukturës së rajonit me atë të kontinentit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.