Huatë me probleme i rikthehen rënies – Zbresin në 5.24% gjatë shtatorit, pasi prekën nivelin më të lartë në gusht

Treguesi i huave me probleme regjistroi rënie të lehtë në muajin shtator, pasi preku nivelin më të lartë vjetor gjatë gushtit. Të dhënat më të fundit të Bankës së Shqipërisë tregojnë se një ndër treguesit më të rëndësishëm të shëndetit financiar bankar, zbriti në nivelin 5,24% në muajin e nëntë të vitit, pasi shënoi 5,3% në gusht.

Treguesi vijon të mbetet pranë niveleve rekord minimale, por pak mbi nivelin e arritur në dhjetor të vitit 2022, pranë 5%, që ishte edhe niveli më i ulët që prej vitit 2008.

Viti 2023 nisi me rritje të treguesit dhe luhatje të hërë pas hershme, por duke mos rrezikuar asnjëherë kapërcime domëthënëse. Kriza e çmimeve, e bashkuar tashmë me krizën e zhvlerësimit të euros, sidomos për bizneset përbën një kërcënim serioz për likuiditetin e huamarrësve, qofshin familjarë, qofshin biznese. Por, mesa tregojnë shifrat, aftësia paguese e tyre nuk është kërcënuar nga këto zhvillime.

Nga ana tjetër, ritmi i kreditimit, si për sektorin privat, ashtu edhe për individët po vazhdon, duke treguar se sektori bankar është mjaftueshëm i shëndetshëm për të shërbyer si një shtyllë e rëndësishme për ekonominë e vendit.

Ndërkohë, rritja e normës së interesit për lekun në 3,25% pak ditë më parë, është një sinjal i rëndësishëm në këtë drejtim. Ky tregues I shtohet pritshmërive të bankave tregtare për tremujorin e fundit të vitit, të cilat presin që kushtet e ofertës për kredi të mos ndryshojnë për bizneset, por të shtrëngohen për individët. Të dy këta faktorë do të sjellin vështirësi në pagesa për huamarrësit, duke ndikuar direkt në rritjen e kredive me problem për muajt në vijim.

Huatë me probleme nisën një trajektore të rrezikshme rritje pas krizës financiare globale që goditi Botën dhe Europën në veçanti, për të kulmuar në 25% të totalit të kredive në vitin 2015 në vendin tonë, duke u kthyer në një kërcënim për sektorin bankar dhe ekonominë në tërësi, si dhe duke e vendosur Shqipërinë të parën në rajon në këtë drejtim.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.