Huatë me probleme, në nivelet e fillimvitit – Për muajin tetor ishin në nivelin prej 5,12%

Treguesi i huave me probleme, një ndër më të rëndësishmit e shëndetit financiar bankar, ka regjistruar një tjetër rënie gjatë muajit tetor. Sipas të dhënave nga Banka e Shqipërisë, norma e huave me probleme ndaj totalit ka zbritur në 5.12%, nga 5.24% që ishte gjatë muajit shtator. Treguesi vijon të mbetet pranë niveleve minimale të këtij viti ku rekordin e arriti në janar me 5,1%, por pak mbi nivelin e arritur në dhjetor të vitit 2022, pranë 5%, që ishte edhe niveli më i ulët i këtij treguesi që prej vitit 2008.

Viti 2023 nisi me rritje të treguesit dhe luhatje të hërë pas hershme, por duke mos rrezikuar asnjëherë kapërcime domëthënëse. Kriza e çmimeve, e bashkuar tashmë me krizën e zhvlerësimit të euros, sidomos për bizneset përbën një kërcënim serioz për likuiditetin e huamarrësve, qofshin familjarë, qofshin biznese. Por, mesa tregojnë shifrat, aftësia paguese e tyre nuk është kërcënuar nga këto zhvillime.

Nga ana tjetër, ritmi i kreditimit, si për sektorin privat, ashtu edhe për individët po vazhdon, duke treguar se sektori bankar është mjaftueshëm i shëndetshëm për të shërbyer si një shtyllë e rëndësishme për ekonominë e vendit.

Ndërkohë, rritja e normës bazë të interesit për lekun në 3,25% rreth një muaj më parë, është një sinjal i rëndësishëm në këtë drejtim. Ky tregues I shtohet pritshmërive të bankave tregtare për tremujorin e fundit të vitit, të cilat presin që kushtet e ofertës për kredi të mos ndryshojnë për bizneset, por të shtrëngohen për individët. Të dy këta faktorë mund të sjellin vështirësi në pagesa për huamarrësit, duke ndikuar direkt në rritjen e kredive me probleme për muajt në vijim.

Huatë me probleme nisën një trajektore të rrezikshme rritje pas krizës financiare globale që goditi Botën dhe Europën në veçanti, për të kulmuar në 25% të totalit të kredive në vitin 2015 në vendin tonë, duke u kthyer në një kërcënim për sektorin bankar dhe ekonominë në tërësi, si dhe duke e vendosur Shqipërinë të parën në rajon në këtë drejtim.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.