Industria e prodhimit në Itali – Rritja e çmimit të energjisë, kompanitë vendore rihartojnë planet

Rritja e çmimeve të energjisë elektrike si pasojë dhe e një serie sanksionesh perëndimore kundër Rusisë, ka goditur rëndë industrinë e prodhimit në Itali, duke detyruar shumë firma të rihartojnë planet e prodhimit për të ulur konsumin e energjisë.

Në rajonin Emilia-Romagna në veri të Italisë, ku rreth 43 mijë firma industriale kontribuojnë me më shumë se 60 miliardë euro në vëllim eksporti çdo vit, industria e prodhimit ishte e zhvilluar mirë.

Ndërsa rritja së çmimeve të energjisë solli gjithashtu ndikim të madh në sipërmarrjet vendore të prodhimit, veçanërisht për ato që vareshin më shumë nga importet ruse të energjisë.

Paolo Mongardi, kryetar u bordit të SACMI, u shpreh se situata aktuale është shqetësuese pasi çmimi i energjisë ka ardhur duke u rritur, duke sjellë kosto më të lartë në prodhim dhe ndikim në të gjithë procesin e prodhimit, gjë që do të sjellë një ndikim të madh dhe tek klientët. SACMI Group, është furnizues makinerish dhe fabrikash të plota për industrinë e prodhimit të qeramikës, metaleve, ambalazhimit dhe kontejnerëve plastikë.

SACMI Group, me prodhimin e pajisjeve qeramike si biznesin e tij kryesor, përdor kaldaja të reja qeramike që konsumojnë hidrogjen si lëndë djegëse dhe përdorin energji fotovoltaike për të reduktuar konsumin e gazit, por kjo qasje alternative nuk mund ta zgjidhë plotësisht problemin.

Sipas të dhënave zyrtare, që nga viti 2013, rreth 40 për qind e importit të gazit natyror në vend është nga Rusia dhe gazi natyror përbën rreth 40 për qind të konsumit të energjisë në Itali.

Roberto Floros, analist i ekonomisë energjitike në Qendrën për Studime Europiane në Itali, vuri në dukje se rinegocimi i çmimit të gazit natyror me Rusinë është një përparësi kryesore për të ringjallur vitalitetin e industrisë së prodhimit.

Ai shtoi se mënyra e vetme për të zgjidhur problemin është rinegocimi i kontratës së energjisë me Rusinë dhe llogaritja e çmimit të gazit natyror me bazë naftën. Kjo është mënyra e vetme për të frenuar pasojat më të rënda që sjell luhatja e tepërt e çmimeve në industri.

Sipas të dhënave të publikuara nga Standard and Poor’s, një nga agjencitë më të mira të vlerësimit të kreditimit në botë, këtë muaj, indeksi i menaxherëve të blerjeve të prodhimit të Italisë ra në 54.5 në prill nga 55.8, pa përjashtuar efektin e faktorëve sezonalë.

Shumë firma prodhuese italiane kanë rregulluar prodhimin e tyre, duke ulur kostot dhe duke kërkuar alternativa në përpjekje për të përballuar çmimet në rritje të energjisë elektrike, gazit natyror, benzinës dhe naftës.

Mongardi shprehet se është e vështirë të shihet rikuperimi i prodhimit në nivelin para krizës Rusi-Ukrainë. Tani për tani, ndërmarrjet mund të mbijetojnë pasi kërkesa e tregut është zgjeruar në krahasim me atë para krizës.

Për një shkallë më të madhe prodhimi, një kosto marxhinale më e ulët që varet nga çmimi i gazit natyror është imperative. “Paqja është e rëndësishme, jo vetëm për një këndvështrim humanitar për të shmangur viktimat, por edhe për rivendosjen e një ekonomie të shëndetshme dhe të lirë ku njerëzit mund të tregtojnë mallra pa asnjë qëllim politik”, përfundoi Mongardi.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.