Inflacioni në Turqi, pranë “pikut” prej 70% – Çmimet nuk po “ndalen” pas rritjes së pagës minimale

Indeksi i Çmimeve të Konsumit në Turqi u rrit më shpejt në më shumë se një vit, pasi politikat fiskale si rritja e pagës minimale, po mbajnë presionet inflacioniste të rritura, pavarësisht një cikli të shpejtë shtrëngimi monetar.

Edhe një muaj i stabilitetit relativ të lirës pas zgjedhjeve lokale në mars, deri më tani nuk po arrin të ndryshojë një përkeqësim të pritjeve për inflacionin që është shfaqur si një pengesë e madhe për uljen e çmimeve. Inflacioni vjetor, i cili është rritur çdo muaj, u përshpejtua përsëri në prill duke arritur në 69,8%.

Rritja mujore e çmimeve, është përshpejtuar për herë të parë që nga janari dhe arriti në 3.18% në prill, treguan të dhënat e fundit të publikuara nga Shërbimi i Statistikave të Turqisë.

Politikëbërësit e Bankës Qendrore vunë në dukje rreziqe të tilla si rritja e inflacionit të shërbimeve dhe shqetësimet gjeopolitike në mbajtjen e normës bazë të interesit në 50% javën e kaluar për herë të dytë këtë vit.

Investitorët po shqyrtojnë përparimin që po bëhet nga Turqia në marrjen e një kontrolli të inflacionit në kohën e kthimit në një vend, obligacionet lokale të të cilit dikur ishin një magnet për të huajt. Flukset hyrëse kanë qenë të ngadalta, edhe pse bankat e mëdha ndërkombëtare tani rekomandojnë blerjen e lirës, ndërsa HSBC e konsideroi Turqinë “një nga tregjet e preferuara”.

Një monedhë më e qëndrueshme mund të ofrojë një lehtësim të mundshëm të inflacionit duke ndihmuar në frenimin e kostos së mallrave të importuara. E zhvlerësuar me gati 4% kundrejt dollarit në mars gjatë parazgjedhjeve, lira ishte kryesisht e qëndrueshme muajin e kaluar dhe është tkurrur gati 9% që nga fillimi i vitit.

Analistët e tregjeve mendojnë se, rreziku i një zhvlerësimi më të shpejtë nominal është ende i konsiderueshëm duke pasur parasysh perspektivën e inflacionit dhe rreziqet nga normat globale, çmimet e naftës dhe gjeopolitika.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.