Institucioni gjerman kërkon 20 mijë punonjës – Bonus prej 3 mijë euro për këdo që punësohet në “Commerzbank”

Pas vitesh ristrukturimi, duke përfshirë shkurtimin e mijëra vendeve të punës, ‘Commerzbank’ në Gjermani tani po punëson punëtorë të rinj në numër të madh. Deri në vitin 2034, banka ka të ngjarë të ketë nevojë për pak më pak se 20 mijë punonjës të rinj, sipas drejtorit të burimeve njerëzore i cili foli për mediat gjermane. Ai pranoi se do të jetë shumë e vështirë të gjendet staf i mjaftueshëm në tregun aktual të punës

Në Europën Lindore, bankat tani paguajnë shpërblime për punonjësit e rinj që arrijnë nga 1 mijë deri në 3 mijë euro. Në Gjermani, bonusi për çdo punonjës të ri është 1.500 euro.

Drejtori i burimeve njerëzore të bankës gjermane shpjegoi se për të mos reduktuar operacionet, çdo vit duhet të punësojnë rreth 2.000 punonjës të rinj – afërsisht gjysma e tyre në Gjermani dhe gjysma tjetër jashtë vendit. Kjo sipas tij është mënyra e vetme për të ruajtur numrin e planifikuar të vendeve të punës me kohë të plotë, i cili mbetet konstant në rreth 36 mijë në të gjithë grupin.

Objektivi kryesor mbetet tërheqja e sa më shumë njerëzve nga tregu i punës brenda një kohe shumë të shkurtër.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.