Italia, në alarm për cilësinë e vajit të ullirit – Përzierjet me vajra të tjerë, të pakontrolluara

Sirena alarmi për shitjet e vajit të ullirit dhe mbi të gjitha mbi të ashtuquajturat produkte zëvendësuese në Itali. “Gropa” e krijuar nga reduktimi i prodhimit në Spanjë, furnizuesi kryesor botëror i vajit të ullirit, që në një vit për shkak të thatësirës, shkoi nga 1.4 milionë ton, në 663 mijë, duke rritur në nivel rekord çmimet e vajit ekstra të virgjër, ka sjellë dhe probleme të tjera.

Situata është raportuar nga Unaprol, shoqata kryesore italiane e prodhuesve të vajit të ullirit, e cila ka kërkuar më shumë vëmendje tek një kategori e re e produkteve me kosto të ulët që po shiten në dyqane, si rezultat i përzierjes së vajit të ullirit dhe vajit të lulediellit, apo me vajra të tjera bimore.

Unaprol ngre shqetësimin në veçanti se çfarë metodash analitike parashikohen për të analizuar përputhjen e këtyre përbërjeve në lidhje me atë që është deklaruar në etiketë dhe treguesin e saktë se sa përqind të vajit të ullirit ekstra të virgjër përmban produkti, për t’i dhënë mundësi konsumatorëve që të zgjedhë me vetëdije.

Sipas shoqatës, vaji i ullirit ekstra i virgjër i është nënshtruar padrejtësisht çmimeve nën kosto, ose çmimit të pandryshueshëm për shumë vite, dhe tani, më në fund, edhe falë situatës ndërkombëtare që është krijuar, kjo nuk mund të ndodhë më. Për këtë arsye, kjo përzierje e përbërë nga përqindjet e mbetura të vajit të ullirit me vajra të tjerë bimorë është vendosur masivisht në raftet e dyqaneve me pakicë për të tërhequr vëmendjen e konsumatorëve. Por kjo përpjekje, pa rregullore dhe kontrolle, rrezikon të jetë mashtruese për ata që blejnë.

Inspektorati qendror për luftën ndaj mashtrimeve tashmë ka sqaruar se ky produkt duhet të vendoset në rafte të posaçëm të dallueshëm qartë nga vaji i ullirit ekstra i virgjër. Por, ekspertët theksojnë se një ndërhyrje në standardin e etiketimit është absolutisht e nevojshme për të garantuar transparencë për konsumatorët dhe konkurrencën e ndershme. Sipas tyre, ajo që nuk mund të verifikohet, nuk mund të deklarohet dhe për rrjedhojë, nuk mund të konkurrojë në treg në kushtet aktuale.

Sezoni i rritjeve të mëdha të çmimeve shihet nga bota e prodhimit si një mundësi duke pasur parasysh se shitjet promocionale të vajit të ullirit ekstra të virgjër në supermarkete kanë rënë prej vitesh.

Sipas Unaprol, epoka e vajit me cilësi të ulët ka përfunduar dhe është e nevojshme të shfrytëzohet ky moment, përmes fushatave të duhura të komunikimit dhe informimit, për t’i bërë njerëzit të kuptojnë se sa e rëndësishme është të konsumohet vaj ulliri ekstra i virgjër cilësor duke e paguar me çmimin e duhur, që është ai aktual.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.