Kina drejt marrëveshjes prej 30 miliardë dollarësh me Katarin për gazin – Vendi drejt zgjerimit të burimeve për shkak të krizës së furnizimit

Gjigantët shtetërorë të energjisë China National Petroleum dhe Sinopec janë në bisedime për të investuar në projektin e Katarit shifrën prej 30 miliardë dollarësh me gaz natyror të lëngshëm, sipas Reuters.

Kompanitë kineze kanë vendosur synimet e tyre në kontratat afatgjata të gazit natyror të lëngshëm të lidhura me projektin e Katarit në Fushën Veriore Lindore dhe një marrëveshje do të shënonte partneritetin e parë të tillë midis Kinës dhe Katarit.

Kina është importuesi më i madh në botë i gazit natyror të lëngshëm dhe dy kompanitë kineze pritet të investojnë 5% të aksioneve në dy njësi të veçanta të lëngëzimit të gazit, nga katër gjithsej që po ndërtohen.

Në fillim të këtij muaji, zyrtarë nga Qatar Energy u takuan me përfaqësues nga kompanitë kryesore kineze të energjisë në Singapor, ku përfshiheshin gjithashtu Cnooc dhe Beijing Gas Group, sipas Bloomberg.

ExxonMobil dhe ConocoPhillips janë gjithashtu të vendosur të blejnë aksione në projektin e zgjerimit të gazit natyror të lëngshëm të Katarit.

Tregjet globale të energjisë kanë qenë në trazira që nga pushtimi rus i Ukrainës në shkurt, dhe marrëveshja e LNG-së me Katarin mund të ndihmojë në mbrojtjen e Kinës nga paqëndrueshmëria.

Çmimet reale të gazit në Azi dhe Evropë janë rritur së fundmi dhe Evropa ka plane të heqë dorë nga gazi i tubacionit rus.

Ndërkohë, Gazprom i Rusisë tha se do të shkurtonte furnizimet me gaz natyror në Gjermani dhe pjesë të tjera të Evropës nëpërmjet tubacionit Nord Stream.

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.