Kina rrit eksportet e makinave elektrike në BE – Mbi 60,000 automjete u shitën në muajin shtator, 61% më shumë se në 2023

Kristi Ceta/SCAN

 

Kina eksportoi më shumë se 60,000 automjete elektrike në Bashkimin Evropian në shtator, me dërgesat që arritën në nivelin e dytë më të lartë të regjistruar ndonjëherë, përpara tarifave shtesë që priten të hyjnë në fuqi në fund të këtij muaji.

Firmat nga ekonomia më e madhe e Azisë dërguan 60,517 makina elektrike në 27 vendet e bllokut evropian muajin e kaluar, 61% më shumë se vitin e kaluar në të njëjtën periudhë, sipas të dhënave doganore. Kulmi i mëparshëm prej 67,455 automjetesh ishte në tetor 2023, kur Komisioni Evropian njoftoi se po fillonte një hetim kundër subvencioneve për automjetet elektrike të prodhuara në Kinë.

BE prezantoi tarifa të përkohshme në qershor dhe kërkoi që kompanitë e synuara të lënë mënjanë garancitë, por zyrtarët thanë në gusht se blloku nuk do t’i mbledhë ato në mënyrë retroaktive. Shtetet anëtare votuan më 4 tetor për të vendosur tarifa të reja deri në 35%, me 10 vende, përfshirë Francën, Italinë dhe Poloninë në favor të masës.

Ndërsa Kina dhe Bashkimi Evropian vazhdojnë të negociojnë një zgjidhje alternative, pritet që tarifat të hyjnë në fuqi në fund të tetorit.

Rritja e dërgesave tregon që prodhuesit kinezë të automjeteve elektrike po shpresojnë të shmangin tarifat e afërta. Pavarësisht kësaj, masa të tilla pritet të ngadalësojnë, por jo të pengojnë ata që dëshirojnë të zgjerohen në tregun fitimprurës evropian.

Makinat kineze shpesh mund të shiten me një çmim më të lartë kundrejt vlerës që do të kishin në tregun vendas, duke shtuar përfitimet për prodhuesit e automjeteve.

Kompania BYD planifikon të krijojë impiante në Hungari dhe Turqi, ashtu si dhe shumë prodhues të tjerë kinezë, që po shqyrtojnë mundësi në Evropë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.