Kyçja e sporteleve rrezikon ndihmën ekonomike – Qytetarët, vështirësi për të marrë dokumentet online. Më parë asistoheshin nga zyrat ADISA  

Mbyllja e sporteleve ka vështirësuar procedurat për qytetarët që trajtohen me ndihmë ekonomike, ndërkohë që mosparaqitja e dokumenteve të nevojshme rrezikon ato pak para’ që marrin çdo muaj. Sipas legjislacionit në fuqi, aplikimi për ndihmë ekonomike bëhet me kartë identiteti, ndërsa duhet të shoqërohet edhe me dokumentin e pronësisë, që mund të merret vetëm online. Më herët qytetarët asistoheshin nga punonjësit e zyrave ADISA në nxjerrjen e dokumentit nga portali e-Albania, por tashmë këto zyra janë të kyçura për qytetarët.

Ndërkohë që, edhe operatorët online të ADISA nuk mund të japin asistencë. Të kontaktuar online, këta operatorë pranuan se për të marrë ndihmën ekonomike mund të aplikohet fizikisht në bashki, por për dokumentet shoqëruese nuk jepet asnjë asistencë. “Nuk zgjidh asgjë tek bashkia. Qytetari e kontrollon vetë llogarinë e tij në e-albania”,-shkruajti një prej operatorëve. Por, ndërkohë vështirësitë në përdorimin e sistemit të e-Albania raportohen nga një numër i lartë qytetarësh, për shkak të pamundësive intelektuale për të krijuar një llogari në e-Albania.

Sipas një raporti të Bankës Botërore, të publikuar në pranverë të vitit 2020, mbi 50% e nxënësve të moshës 15 vjeç në Shqipëri janë analfabetë funksionalë. Kjo do të thotë se ata dinë të shkruajnë dhe lexojnë, por nuk e dinë kuptimin e asaj që shkruajnë apo lexojnë. Ndërkohë që, sipas ekspertëve nëse studimi do të ishte kryer në mosha më të mëdha gjendja do të ishte më e rëndë. Kjo do të thotë se vështirësitë për të kryer vetë procedurat online janë të mëdha, ndërkohë që drejtimi në qendra interneti ofrohet vetëm kundrejt pagesave, që janë të kripura.

Kjo sidomos për ata qytetarë, që trajtohen me ndihmë ekonomike. Sipas të dhënave zyrtare nga INSTAT, në 4-mujorin e fundit të vitit 2021, numri mesatar i familjeve që përfitojnë ndihmë ekonomike ishte 63.714. Ndërkohë që, sipas Raporti vjetor të Avokatit të Popullit për vitin 2021, masa e ndihmës ekonomike është 3 herë më e ulët se vlera  minimumit jetik, të përllogaritur nga ky institucion, por e pa përcaktuar ligjërisht.

Po ashtu, sipas raportit “masa e ndihmës ekonomike vijon të raportohet nga qytetarët në ankesat e tyre edhe përgjatë vitit 2021, si shumë e ulët në raport me shpenzimet mujore më të domosdoshme për të mbijetuar, e jo më pastaj të synojë të zbusë varfërinë dhe të mundësojë integrimin social të individëve dhe familjeve, çka përbën edhe objektivin kryesor të këtij instrumenti të mbrojtjes sociale.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.