Ligji i pronave në Gjykatën Kushtetuese – Komuniteti Mysliman paralajmëron: Në Strasburg nëse nuk merren në konsideratë kërkesat

Më pak se 30 përqind e pronave të Komunitetit Mysliman janë kthyer apo kompensuar ndër vite, ndërsa nga ndryshimet e bëra në ligjin “Për trajtimin e pronave dhe përfundimin e proceseve kalimtare të pronësisë” preken edhe rreth 160 aplikime të tjera të cilat sipas përfaqësuesit ligjor të KMSH-së Arjan Muça rrezikojnë që të dalin me vlere negative apo të konsiderohen të ezauruara.

Në intervistën dhënë për emisionin “Box to Box” Muça tha se përveç formulës së vlerësimit të dosjeve, Komuniteti Mysliman i Shqipërisë ka kundërshtuar edhe një nen të ligjit të miratuar në 2022 në të cilin përcaktohet se indeksimi i faturës së kompensimit do të bëhet deri në momentin e publikimit të vlerës së kompensimit dhe jo deri në momentin që bëhet ekzekutimi i saj, sikundër është rekomanduar edhe nga Gjykata e Strasburgut.

Kujtojmë që datën 13 dhjetor, Kushtetuesja pritet që të dalë me një vendim mbi padinë e depozituar nga KMSH. Përfaqësuesi ligjor tha se pritshmëritë janë pozitive për shkak se është pranuar një ndër kërkesat e bëra që ka të bëjë me pezullimin e procesit. Por megjithatë, thotë Muça nëse Gjykata shprehet kundër do të shihet mundësia për ta dërguar çështjen deri në gjykatën e Strasburgut.

Sakaq, Agjencia e Trajtimit të Pronave përmes një deklarate për mediat pas vendimit të Kushtetueses reagoi, duke vënë në dukje se është pezulluar procesi i shqyrtimit për 7000 dosjeve të patrajtuara ndërsa rrezikohet edhe djegia e fondit të alokuar për këtë vit.

“Pezullimi aktual i ligjit do të rezultojë në vonesa dhe shtyrje të zgjidhjes përfundimare të procesit të kompensimit. Kjo ndikon jo vetëm pronarët, por gjithashtu shoqërinë shqiptare në tërësi. Fondi i kompensimit për vitin 2023, i cili do të përdorej për kompensim financiar, tani do të pësojë djegie në vlerën 2.340.000.000 lekë”, thuhej në deklaratë.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.