Lumi Lana, rehabilitim nga Pallati me Shigjeta në Kashar – Hapet tenderi. Çfarë përfshin projekti përgjatë gjatësisë prej 1.8 km

Ola Mitre/ SCAN

Lumi Lana, në gjatësinë nga Pallati me Shigjeta deri në Kashar do t’i nënshtrohet rikualifikimit urban, teksa në faqen e prokurimeve publike të Bashkimit Evropian është hapur tenderi për përzgjedhjen e kompanisë që do të kryejë punimet.

Objekti i punimeve do të përfshijë prishjen dhe pastrimin e banesave informale dhe strukturave të tjera të ulta, rregullimin e një gjatësie prej 1.8 km të lumit, ndërtimin e bulevardeve, duke përfshirë shtigje të dedikuara për çiklistët dhe këmbësorët, në të dyja anët e lumit, si dhe ndërtimin e dy urave për këmbësorë me trarë çeliku. Po ashtu, projekti përfshin ndërtimin e rrjeteve të tubacioneve për ujërat e shirave dhe ujërat e ndotur, sistemet e vaditjes, të ndriçimit, etj.

Projekti zbatohet nga Bashkia e Tiranës, ndërkohë që kontrata financohet përmes një kredie të marrë pak vite më parë nga Banka Evropiane e Investimeve. Më herët nga Bashkia e Tiranës është bërë me dije se nga zbatimi i këtij projekti do të preken 24 banesa, që disponojnë certifikatë pronësie, si dhe 211 struktura që nuk kanë dokumente pronësie. Po ashtu, projekti përfshin edhe 9 struktura të tjera dhe 71 parcela tokash, që në kohën e prezantimit të projektit ishin në proces verifikimi.

Sipas tenderit, punimet do të zgjatin 36 muaj nga momenti i nënshkrimit të kontratës me kompaninë që do të shpallet fituese

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.