Macron konsideron integrimin e Ukrainës, Moldavisë dhe vendeve në Ballkanin Perëndimor në BE – Duhet të evoluojmë drejt një bashkimi “me shumë shpejtësi”

Presidenti francez Emmanuel Macron tha se BE-ja “ndoshta” duhet të evoluojë drejt një bashkimi “me shumë shpejtësi” ndërsa konsideron integrimin e Ukrainës, Moldavisë dhe vendeve në Ballkanin Perëndimor.

Macron tha se BE-ja duhet të reformojë nëse dëshiron të integrojë kombe të reja dhe duhet të ndërtojë konsensus me më shumë se 30 vende anëtare.

“Rreziku është të mendojmë se mund të zgjerohemi pa reforma. Mund të dëshmoj se është mjaft e vështirë për Evropën të përparojë në tema të ndjeshme me 27 anëtarë. Me 32 ose 35 anëtarë, nuk do të jetë më e lehtë”, tha ai në mbledhjen vjetore të ambasadorëve francezë në Paris.

“Ne do të kemi nevojë për guxim, për të pranuar më shumë integrim në disa fusha dhe ndoshta edhe një Evropë me shumë shpejtësi,” tha ai.

Presidenti francez nuk elaboroi se si do të funksiononte kjo Evropë me shumë shpejtësi, por shtoi se një rishikim i procedurave të BE-së ishte i nevojshëm që blloku të thellonte dhe të ruante “tërheqjen e tij”.

Sipas disa zyrtarëve francezë, qeveria e Macron po punon për disa propozime për një Evropë me shumë shpejtësi, e cila do të përfshinte krijimin e grupeve joformale të vendeve anëtare që do të punonin në fusha specifike të politikave.

Macron la të kuptohet gjithashtu se ai do të detajojë mendimet e tij për zgjerimin dhe reformën e BE-së në muajt në vijim, dhe përpara zgjedhjeve të BE-së vitin e ardhshëm.

Ukraina dhe Moldavia iu dha statusi i kandidatit për në BE në qershor dhe disa zëra po bëjnë thirrje që BE të hapë bisedimet e pranimit deri në dhjetor.

Pavarësisht nga shenjat se kundërofensiva ukrainase po përparon më ngadalë se sa pritej, Macron gjithashtu përsëriti mbështetjen e tij të plotë për Ukrainën.

“Rusia nuk mund dhe nuk duhet të fitojë. Do të ishte fundi i çdo besimi në të drejtën ndërkombëtare. Ukraina do të jetë një investim përsa i përket diplomacisë dhe burimeve në vitet në vijim. Ne nuk mund të pretendojmë se kjo përpjekje nuk ekzistonte”, u tha ai diplomatëve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.