Masa më të ashpra ndaj dhunës në Kuvend – Grupi i PS depoziton projektvendimin për miratim me procedurë të përshpejtuar
Situatat e tensionuara të përsëritura në sallën e seancave plenare me tymues dhe flakadanë, por edhe në komisionet e përhershme të Kuvendit, mund të marrin fund së shpejti. Grupi parlamentar i Partisë Socialistë ka depozituar një projektvendim për disa ndryshime në rregulloren e Kuvendit që duhet miratuar me procedurë të përshpejtuar.
Sa i përket masave disiplinore “përjashtim nga pjesëmarrja në komisione dhe/ose seancë plenare” ato parashikohet të jenë deri në 10 ditë, 30 ditë, apo 60 ditë. Masa disiplinore “përjashtim nga pjesëmarrja në komisione apo seancë plenare” deri në 30 ditë” jepet në rastet kur deputeti përdor dhunë fizike ndaj deputetëve të tjerë, anëtarëve të Këshillit të Ministrave, punonjësve të shërbimit të seancave apo të Gardës së Republikës.
Gjithashtu, kur deputeti përmes veprimeve të dhunshme dëmton pajisjet dhe orenditë e çdo mjet tjetër logjistik në sallën e seancave apo mbledhjes, si dhe kur deputeti kryen në mënyrë të përsëritur brenda një sesioni parlamentar shkeljet e parashikuara më sipër.
Masa disiplinore “përjashtim nga pjesëmarrja në komisione apo seancë plenare deri në 60 ditë” jepet në rastet kur deputeti përdor lëndë apo mjete piroteknike, tymuese, bojra dhe materiale apo mjete të tjera të ngjashme brenda sallës së zhvillimit të punimeve të Kuvendit, mbledhjes së komisionit, brenda mjediseve të Kuvendit.
Kjo masë jepet edhe kur deputeti kryen veprime ose sjellje që përbëjnë shkeje që konfigurohen si shkelje penale pavarësisht nëse shkelja përben vepër penale sipas Kodit Penal, si dhe kur deputeti kryen në mënyrë të përsëritur brenda një sesioni parlamentar shkeljet e parashikuara më sipër.
Gjatë periudhës së zbatimit të masës displinore deputeti ndalohet të kryejë edhe çdo veprimtari tjetër si anëtar i Kuvendit.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.