Mbi 60 vende mbështesin marrëveshjen për të trefishuar energjinë e rinovueshme këtë dekadë!

Më shumë se 60 vende kanë thënë se mbështesin një marrëveshje të udhëhequr nga Bashkimi Europian, Shtetet e Bashkuara dhe Emiratet e Bashkuara Arabe për të trefishuar energjinë e rinovueshme këtë dekadë dhe për t’u larguar nga qymyri, sipas Reuters.

BE, SHBA dhe Emiratet e Bashkuara Arabe kanë mbledhur mbështetje për zotimin përpara negociatave vjetore të OKB-së për klimën COP28 që do të mbahen nga 30 nëntor deri më 12 dhjetor në Dubai dhe do të bëjnë thirrje për përfshirjen e tij në rezultatin përfundimtar të një mbledhjeje të udhëheqësit botërorë më 2 dhjetor, thanë zyrtarët.

Disa ekonomi të mëdha në zhvillim si Nigeria, Afrika e Jugut dhe Vietnami, vende të zhvilluara si Australia, Japonia dhe Kanadaja, dhe të tjera duke përfshirë Perunë, Kilin, Zambinë dhe Barbados kanë thënë se do t’i bashkohen premtimit, thanë zyrtarët për Reuters.

Një draft i premtimit, i shqyrtuar nga Reuters, do të angazhonte gjithashtu ata që e nënshkruajnë atë që të dyfishojnë normën vjetore botërore të përmirësimit të efikasitetit të energjisë në 4% në vit deri në vitin 2030.

Drafti thotë se përdorimi më i madh i burimeve të rinovueshme duhet të shoqërohet me “uljen e energjisë së pandërprerë të qymyrit”, duke përfshirë përfundimin e financimit të termocentraleve të reja me qymyr.

Një nga zyrtarët i tha Reuters se negociatat me Kinën dhe Indinë për t’u bashkuar me premtimin janë “mjaft të avancuara”, megjithëse asnjëra nuk ka pranuar ende të bashkohet.

Shkencëtarët thonë se të dy veprimet – zgjerimi i shpejtë i energjisë së pastër dhe reduktimi i shpejtë i djegies së karburanteve fosile që emetojnë CO2 në sektorin e energjisë – janë jetike nëse bota do të shmangë ndryshimet më të rënda klimatike.

Zyrtarët thanë se një shfaqje e hershme e mbështetjes për trefishimin e energjisë së rinovueshme dhe largimin nga qymyri do të krijojë vrull dhe do të vendosë një ton pozitiv përpara ditëve të negociatave të tensionuara që priten në konferencën për klimën.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.