Mbi 9 mln dollarë kosto e librave falas – Përfitojnë më shumë se 239 mijë nxënës në këtë vit shkollor

Hamit Yzeiraj/SCAN

 

Mbi 9 milionë dollarë është kostoja që buxheti i shtetit ka akorduar në këtë fillim të vitit të ri shkollor për librat falas në sistemin parauniversitar. Shpërndarja që ka nisur në ditët e fundit të muajit gusht, thuajse ka përfunduar dhe kanë përfituar më shumë se 239 mijë nxënës në sistemin e arsimit bazë, si dhe 16 kategori të nxënësve në arsimin e mesëm.

Në këtë kategorizim të kryer nga Ministria e Arsimit dhe Sportit përfshihen nxënës, të cilët vijnë nga familje me problematika sociale dhe ekonomike, ata më aftësi ndryshe, apo nga pakicat, minoritetet, komuniteti rom dhe egjiptian.

Sipas të dhënave zyrtare, janë rreth 227 mijë nxënës nga klasa I deri në klasën IX që do të pajisen me tekste falas dhe rreth 12,500 nxënës nga klasa e dhjetë deri në klasën e dymbëdhjetë që i përkasin kategorive të caktuara të cilët përfitojnë mbështetje pr tekstet falas. Ky program i mbështetjes së librave falas është i fokusuar për nxënësit që vijnë nga familje me problematika sociale dhe ekonomike, si dhe ata që kanë nevojë për mbështetje të veçantë, përfshirë fëmijët me aftësi ndryshe dhe ata nga pakicat dhe minoritetet.

Për sa i përket klasës I-III kjo është një mbështetje që garantohet çdo vit dhe pjesa tjetër është sipas një sistemi të realizuar nëpërmjet trashëgimit të librit. Gjatë këtij viti ka libra të rinj që futen për herë të parë që është klasa e IV, klasat e VIII dhe IX.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.