Me temperatura deri 35 gradë Celsius – Njerëzit ende në plazh ndërsa Franca dhe Spanja përjetojnë tetor jashtëzakonisht të nxehtë

Franca dhe Spanja po shohin temperatura jashtëzakonisht të larta këtë muaj duke shtuar shqetësimet për ndryshimet e motit të planetit lidhur me ndryshimet klimatike.

Në Hossegor në Francën jugperëndimore, njerëzit u dyndën në plazh ndërsa temperaturat arritën 29 gradë. Disa roje plazhi zgjatën periudhën e punës për të përballuar rritjen e vizitorëve për shkak të temperaturave të larta.

Në të njëjtën kohë, Spanja po përjeton tetorin e saj më të nxehtë që nga fillimi i regjistrimeve.

Në Morón de la Frontera në Spanjën jugore, temperaturat i kaluan 34.5 gradë Celsius. Dhe çdo ditë e muajit, përveç 1 tetorit, ka qenë më e ngrohtë se zakonisht.

Temperaturat e larta dhe mungesa e shiut kanë bërë që disa rajone të vendosin kufizime të ujit.

Për javën e kaluar, banorët në L’Espluga de Francoli në lindje të Spanjës nuk kanë pasur qasje në ujë të pijshëm për gjysmën e ditës.

Në Galicia, Katalonjë dhe Andaluzi, rezervuarët kanë rënë në rreth 40 për qind të kapacitetit të tyre.

Ekspertët e klimës ngritën gjithashtu shqetësime këtë javë kur agjencia e motit të OKB-së njoftoi se gazrat serrë arritën nivele të larta rekord.

“Në të tre këto gaze (dioksid karboni, metani dhe oksidi i azotit), ne kemi thyer përsëri rekorde të reja. Pra, ne nuk kemi parë ndonjë përmirësim të vërtetë në atmosferë deri më tani,” tha Petteri Taalas, Sekretari i Përgjithshëm i Organizata Botërore Meteorologjike.

Programi i Mjedisit i OKB-së (UNEP) ka thënë gjithashtu se nuk ka “asnjë rrugë të besueshme” për të parandaluar që temperaturat globale të kalojnë 1.5 gradë mbi temperaturat para-industriale, një objektiv i vendosur nga Konferenca e Klimës së Parisit 2015.

“Ne patëm mundësinë për të bërë ndryshime në rritje, por ajo kohë ka mbaruar,” tha Inger Andersen, Drejtore Ekzekutive e UNEP.

“Vetëm një transformim rrënjësor i ekonomive dhe shoqërive tona mund të na shpëtojë nga përshpejtimi i katastrofës klimatike.”

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.