Moska pezullon tregtimin e frangave zvicerane – Cilat janë pasojat e sanksioneve të reja?!

Bursa e Moskës tha se do të pezullojë tregtimin e frangës zvicerane kundrejt rublës dhe dollarit amerikan nga e marta pasi Zvicra miratoi sanksione të reja të BE-së kundër Rusisë.

Bursa e Moskës, bursa më e madhe e Rusisë, tha se kishte vështirësi në kryerjen e transaksioneve në monedhën zvicerane si rezultat i kufizimeve të reja tregtare të vendosura nga Zvicra javën e kaluar.

“Pezullimi i operacioneve është për shkak të vështirësive në kryerjen e shlyerjeve në franga zvicerane me të cilat përballen pjesëmarrësit e tregut dhe sektori financiar në lidhje me masat kufizuese të vendosura nga Zvicra më 10 qershor”, thuhet në një deklaratë të Bursës së Moskës.

Zvicra, e cila nuk është anëtare e Bashkimit Europian, përditësoi paketën e saj të sanksioneve të premten e kaluar për të përputhur me kufizimet e fundit të BE-së kundër bizneseve, bankave dhe individëve nga Rusia dhe Bjellorusia.

Perëndimi ka vendosur një paketë të paprecedentë sanksionesh ndaj Rusisë dhe ka shkaktuar përçarje të rënda financiare brenda vendit në lëvizjet për të ndëshkuar Moskën për dërgimin e ushtrisë së saj në Ukrainë në atë që Kremlini e quan një “operacion ushtarak special”.

Bursa e Moskës tha se po kërkonte një zgjidhje të mundshme dhe shpresonte të gjente një mënyrë për të rifilluar tregtimin e frangave zvicerane në të ardhmen.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.