Motori kryesor i kërkimit në internet – Google pagoi 26 miliardë dollarë në vitin 2021
Alphabet, e cila zotëron Google, u pagoi 26.3 miliardë dollarë kompanive të tjera në vitin 2021 për ta bërë atë motor kërkimi të paracaktuar në shfletues dhe telefona.
Lajmi u konfirmua nga deklarata e një prej drejtuesve më të lartë të kompanisë në gjykatë në Shtetet e Bashkuara të Amerikës.
Shuma e pagesave të paracaktuara që Google ka bërë është më shumë se trefishuar që nga viti 2014, pohoi një zyrtar përgjegjës për kërkimin dhe reklamimin.
Të ardhurat nga reklamat e rrjetit të Google ishin 146.4 miliardë dollarë në 2021-shin, me pagesat për statusin e ‘paracaktuar’ që ishin shpenzimi më i madh, tha zyrtari. Google nuk pranoi t’u përgjigjej pyetjeve në lidhje me këtë kur u kontaktua nga agjencia britanike.
Sipas deklaratës së Google, marrëveshjet e ndarjes së të ardhurave janë të ligjshme dhe ata kanë investuar për të mbajtur konkurruese bizneset e tyre të kërkimit dhe reklamimit. Gjithashtu kompania pretemdon se nëse njerëzit janë të pakënaqur me cilësinë, ata thjesht mund të ndërrojnë shfletues.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.