Musk “shënjestron” punën nga shtëpia – “Është marrëzi dhe moralisht e gabuar!”
Puna nga shtëpia është marrëzi dhe moralisht e gabuar, deklaroi CEO i Tesla, Elon Musk, në raundin e tij të fundit të kritikave ndaj praktikës së punësimit që ka përcaktuar epokën e pandemisë së koronavirusit. Në një intervistë me televizionin CNBC, Musk, një nga njerëzit më të pasur në botë, i quajti punëtorët e teknologjisë në Silicon Valley “klasa e laptopëve që jetojnë në la-la-land”.
Ai tha se besonte se puna në një zyrë rrit produktivitetin – dhe se punonjësit që refuzuan të ktheheshin në mjedisin e punës pas përfundimit të kufizimeve të COVID-19 duhet të “zbesin në tokë” dhe të kthehen në punë si gjithë të tjerët.
Musk theksoi se përvecse një çështje produktiviteti, është gjithashtu një çështje morale. Direktivat e kthimit në zyrë në Silicon Valley dhe në të gjithë vendin janë përballur me rezistencë nga punëtorët, duke vendosur nën presion drejtuesit.
Produktiviteti në kompani me sa duket u dobësua dhe pritshmëritë e investitorëve u rritën, duke detyruar drejtuesit në kompani si Amazon dhe Salesforce të kërkojnë që punëtorët të kthehen në zyrat e tyre, sipas CNBC. Musk ka qenë gjithnjë një kritik i hapur i punës në distancë.
Pas blerjes së tij të suksesshme prej 44 miliardë dollarësh të Twitter, Musk u dërgoi një email të gjithë punonjësve në nëntor duke u thënë atyre se nuk do të lejohen më të punojnë nga shtëpia nëse ai personalisht nuk e miraton atë dhe duhet të jenë në zyrë për 40 orë në javë.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.